DILI, STLNEWS.co – Kareta funerariu nee governu liu husi Ministeriu Solidariedade Sosial no Inkluzaun (MSSI) dezentraliza kareta funerariu rua ba iha munisipiu idak-idak.
Ita hotu hatete katak, kareta funerariu ho kaisaun ba matebian sira, ita desentraliza hotu ona ba munisipiu idak-idak, Diretor Jeral MSSI, Florencio Pina Dias Gonzaga ba STL liu husi telefone iha nia knaar fatin MSSI, kuarta (05/07/2023).
Nia tenik, parte neebe mak responsabilidade Diresaun Asaun Sosial, tanba kareta funerariu Hand Over kareta funerariu rua ba kada munisipiu idak-idak. Ida nee munisipiu mak sei zere, karik kareta aat sira rasik mak halo manutensaun.
Nia esplika, iha nivel nasioanl MSSI nian, ida nee atu antisipa hodi reforsa munisipiu sira, tanba ezemplu pasiente avakua husi munisipiu mai HNGV mak mate iha HNGV Dili, ida nee mak foin MSSI fasilita kareta funerariu nee hodi ba munisipiu.
Maibe dala ruma iha HNGV ka iha Dili laran nee mate liu ema nain 5 ou 6, nee kareta funerariu Munisipiu Dili nian la too, tanba dala ruma oras neebe hanesan, tanba nee tenki kordenasaun diak ho ami para ita bele apoiu,” nia esplika.
Nia dehan, kareta funerariu iha munisipiu karik falha no la konsege fasilta diak, dala ruma volume atendimentu ba matebian barak, maibe kareta funerariu rua deit, nee MSSI hatate katak kompetensia Administrasaun Munisipiu sira nian.
Iha mos posibilidade atu kordena ho MSSI, hanesan Baukau ba Vikeke ema mate iha neeba, mais kareta funerariu rua sei atende seluk, nee dala ruma sira komunika mai iha MSSI, depois ita fasilita kareta funerariu husi Dili nian ba tula fali mate isin ba munisipiu neebe mak nia hela ba, ida nee mak ita halo,” nia deklara.
Iha fatin ketak, Prezidente Autoridade Munisipiu Dili (PAMD), Guilhermina Filomena Saldanha Ribeiro apela ba komunidade hotu atu haree informasaun ka avizu sira neebe Autoridade Munisipiu Dili fahe hela ba Autoridade Lokal sira, atu nunee karik familia ruma mate bele haree numeru telefone neebe taka iha suku sira.
Familia ruma mate atu persiza dokumentu ruma no guia do obitu, iha avizu iha ona, nunee husu ba komunidade sira atu asesu ba informasaun sira hodi haklean, karik familia mate bele kontaktu tuir dalan no atendimentu neebe halo husi AMD no MSSI.
Tuir dadus neebe STL asesu iha terenu, kareta funerariu iha MSSI hamutuk 14, husi numeru nee VIP ida, maibe kareta funerariu 10 mak oras nee halao operasaun, no 4 mak sei iha manutesaun.
(jen)
