Kareta Funerariu Rua Iha Ermera Avaria

Foto Ilustrasaun: GSE

DILI, STLNEWS.co – Kareta funerariu rua neebe apoia husi Ministeriu Solidaridade Sosial no Inkluzaun (MSSI) kondisaun avaria hela, tanba nee familia kous mate isin hodi sae transporte publiku.

Presidente Autoridade Munisipio Ermera, Jose Martinho dos Santos rekonese iha semana kotuk liu ba bebe ida husi suku Fatubesi, Postu Administrativu Hatolia B halo tratamentu iha sentru saude Gleno, maibe lakonsege salva tanba kondisaun grave, iha fatin nee familia mate nian kous nia oan hodi sae transporte Publiku, tanba kareta funerariu avaria.

“Familia deside lori fila mate isin ba suku Fatubesi, no momentu ida nee sira kontaktu atu hetan apoia kargu funerariu, maibe dadaun nee kareta rua iha munisipiu avaria hotu entau ita labele apoia,” hatete Jose ba STL, liu husi telefone, Tersa (02/03/2021).

Nia dehan, sira konsegue kontaktu nasional atu apoia kareta funerariu hodi transporta mate isin nee, maibe nasional kareta hotu sai halo transportasaun ba mate isin tanba nee familia la aguenta hein hodi kous mate isin sae transporte publiku ba postu, no kontinua lao ain ba hela fatin iha Fatubesi.

Nia esplika, sira laiha planu atu sosa kareta funerariu foun tanba tinan 2021, sira hetan orsamentu kapital minor ho montante US$80,000 resin atu sosa kadeira meja ba funsionario sira hodi halo servisu.

Kareta funerariu rua nee iha hela oficina atu halo manutensaun tanba atu sosa kareta foun ho kustu US$45,000 to’o US$50,000 nee orsamentu laiha.

Iha fatin seluk, Diretor Nasional de Asistensia Sosial, iha Ministeriu Solidaridade Sosial no Inkluzaun (MSSI), Lucas Tois hatete, servisu asistensia ba kareta funerariu desentraliza ona, signifika responsabilidade Autoridade Munisipiu sira atu halo jestaun hodi fo asistensia ba komunidade iha munisipiu laran.

Nia dehan, sidadaun sira neebe mai halo tratamentu iha hospital nasional la konsege salva bele kontaktu diresaun nasional asistensia sosial atu apoia transporta mate isin husi hospital ba too iha uma.*

Reportajen: Jeniche da Costa
Editora: Carme Ximenes

LEAVE A REPLY

Please enter your comment!
Please enter your name here