Kastigu Sidadaun Tama Sai Ilegal Iha Fronteira

Direitor Sentru Integradu Jestaun Krize (SIJK), Brigadeiru Jeneral Joao Miranda 'Aluc" rekomenda ba governu atu implementa medida rigoruzu hanesan aplika kastigu no selu rasik alimentar, ba sidadaun sira neebe kontinua tama ilegal iha lina fronteira terestre. (Foto: STL/Alberto Menezes)

DILI, STLNEWS.co – Direitor Sentru Integradu Jestaun Krize (SIJK), Brigadeiru Jeneral Joao Miranda ‘Aluc” rekomenda ba governu atu implementa medida rigoruzu hanesan aplika kastigu no selu rasik alimentar, ba sidadaun sira neebe kontinua tama ilegal iha lina fronteira terestre.

Nia dehan, enkontru ho Primeiru Ministru, Taur Matan Ruak nee hodi atualiza serbisu neebe liga ho Sentru Integradu Jestaun Krize (SIJK), liu liu situasaun sira neebe kontinua eziste nafatin hanesan moras Covid-19.

Tanba atu prevene moras Covid-19 iha Timor Leste, presiza iha medida neebe rigoruzu ba sidadaun sira neebe kontinua tama ilegal iha lina fronteira.

“Ohin fo hanoin ba Primeiru Ministru oinsa mak atu foti medidas ba sidadaun sira, neebe kontinua halo klandestina kontinua tama ilegal iha lina fronteira,” dehan Direitor SIJ) Brigadeiru Jeneral Joao, ba jornalista, iha Palasiu Governu, Dili, Segunda (25/01/2021).

Nia dehan, medida sira neebe durante nee governu uza hanesan wainhira kaer kona sidadaun sira tama sai ilegal iha fronteira lori ba fatin kuarentina no liu 14 dias bele haruka sira fila uma ladun efetivu, tanba hatoman ona sira no movimentu ilegal iha lina fronteira terestre kontinua akontese.

Hanesan ho situasaun Covid-19 neebe mak dadaun nee iha nasaun vizinu Indonezia liu liu iha lina fronteira terestre kazu kontinua sae makas, tanba nee governu presiza implementa medida prevensaun neebe rigoru hanesan aplika sansaun disiplinar ka kastigu sira nunee bele trava atividade ilegal sira.

“Hau hanoin medida neebe governu tenki foti nee mak wainhira kaer kona sira mai iha karantina tenki aplika sansaun disiplinar hanesan tenki kastigu no alimentar neebe mak sira hetan nee tenki selu rasik,” nia esplika.*

Reportajen: Alberto Menezes
Editora: Carme Ximenes

LEAVE A REPLY

Please enter your comment!
Please enter your name here