DILI, STLNEWS.co – Governu Indonezia liu husi nia Embaixada iha Timor Leste realiza Cultural Indonesian Performances And Night Market 2023 neebe sei halao iha Resintu Timor Plaza, Dili, Sabadu (26/8/2023). Serimonia nee, espesialmente sei loke husi Primeiru Ministru (PM) Xanana Gusmao.
Embaixador Indonezia ba Timor Leste, Okto Dorinus Manik liu hosi konferensia imprensa iha KBRI Dili, informa katak objetivu hosi Cultural Indonesian Performances And Night Market 2023 nee atu hametin relasaun amizade entre Indonezia no Timor Leste, nomos komemora loron Proklamasaun Independensia Republika Indonezia ba dala 78.
Nia dehan eventu Cultural Indonesian Performances And Night Market 2023 hanesan atividade anual neebe tinan-tinan KBRI realiza, maiba iha tinan 2023 nee diferente ho tinan-tinan liu ba, tanba tinan nee, KBRI Dili konvida artista nain rua hosi Indonezia mak hanesan, Toton Caribo no Justy Aldrin.
“Eventu ida ne’e mak eventu annual ida neebé mak KBRI Dili realiza. Maibé eventu tinan nee halao ho animadu no eventu ida nee bele hametin liutan relasaun entre Indonézia no Timor-Leste sai diak liu tan. Tanba ne’e, iha eventu nee ami konvida artista nain rua, Toton Caribo no Justy Aldrin hosi Provínsia Maluku, Indonézia nian, neebé ita-nia ema Timor-Leste barak mak konhese no familiar ho sira nia múzika,” dehan Embaixador Okto Manik.
Nia mos dehan katak eventu ida nee loke ba publiku no espera katak ema barak bele mai iha Timor Plaza hodi asisti eventu Cultural Indonesian Performances And Night Market 2023. Iha serimonia nee, komunidade hosi Indonezia sei aprezenta sira nia kultura hanesan, hosi Bali sei aprezenta dansa, aprezenta mos musika angklung no hosi kumunidade Batak sei aprezenta dansa “Tor-Tor Harbo Paung”. Hosi komunidade Flobamora no Malaka mos sei aprezenta sira nia kultura.
Entretantu, artista Justy Aldrin hatete katak nia ho nia kolega hato’o agradese wain ba KBRI Dili tanba konvida sira atu kanta iha eventu Cultural Indonesian Performances And Night Market 2023 iha Dili.
“Dala barak ona ami mai Timor Leste. Tinan kotuk mos ami mai dala rua iha Dili no dau-daun nee ami mai iha Oekusi. Entaun, hau nia hanoin kona-ba sentidu atu mai fali iha Timor-Leste, seidauk muda,” dehan Justin.
Justin mos dehan katak nia ho nia kolega Toton Caribo sei aprezenta musika lubuk inklui musika rua ho lian Tetun. “Ami nain rua famozu ho kanta-kanta Timor nian no boot liu hosi konhese ba kultura Timor-Leste, inklui kanta ho titlu “Bale Pulang 2/Angin Datang Kasih Kabar.”
Iha eventu eventu Cultural Indonesian Performances And Night Market 2023 nee, grupu Dharma Wanita Perstuan (DWP) KBRI Dili sei aprezenta mos Fashion Show.
(mik)
