Klientes Sosa Produtu Iha Loja Arte

Durante nee klientes sira sempre ba sosa produtu iha loja arte ETDA Fatuhada, tanba joven sira iha talentu neebe diak hodi produs produtu, hanesan sanan rai, bikan, kopu, trofi ou piala no sasan sira seluk tan. (Foto: STL/Jacinta Sequeira)

DILI, STLNEWS.co – Durante nee klientes sira sempre ba sosa produtu iha loja arte ETDA Fatuhada, tanba joven sira iha talentu neebe diak hodi produs produtu, hanesan sanan rai, bikan, kopu, trofi ou piala no sasan sira seluk tan.

Tuir Ceramic painter, Aderito de Jesus Soares dehan, produtu neebe mak sira produs iha fatin ida nee mak hanesan, sanan rai, kopu sikra bikan, buli, plaka, jaru, trofi ou piala,omos patun, tanba produtu hirak nee, durante nee sira sempre produs iha fatin ida nee.

“Hau hanoin iha nee, sasan sira nee ninia material mak hanesan, uja tahu mutin, sasan sira neebe mak uja nee, importa husi suis, maibe balun iha ita nian mos iha, maibe primeiru atu tama, prosesu tenke liu husi mesin neebe mak uja, depois ami sei hasai nia ar, para bele fresku fila-fali, ami nia kolega ida mak halo produtu, nee konforme hanesan, sanan rai, kopu, bikan plaka no seluk tan, depois halo husik maran lai uituan, nomos halo kaber fila-fali, husi ida nee mak tama ba iha prosesu pinta ninia, tama iha prosesu pinta nee, hau ho kolega ida, ami nain rua mak pinta, hafoin nee tama iha prosesu halo produtu hirak nee sai nabilan,” dehan Aderito ba STL, iha nia knaar fatin EDTA Fatuhada, Dili, Kuarta (09/12/2020).

Nia hatete, iha nee joven Timor oan deit mak halo servisu iha fatin ida nee, hamutuk ema nain 4 mak servisu iha nee, nain rua halo produtu, no nain rua seluk hein pinta,produtu sira nee, dala ruma ema mai sosa iha fatin neebe mak sira prepara ona, konaba presu, depende ba iha kualiadade produtu ida-idak nian.

“Hau nian mensajen mak atu hatoo ba ita nian maluk Timor oan sira hotu, liu-liu joven sira neebe mak sei iha atividades ou inisiativa neebe mak boot, tenke hola parte iha area arte ninia, tanba nee, hola parte mos iha turizmu ninia, oinsa mak liu husi arte nian, bele lori Timor nee ba iha mundu ou ba internasional, tanba ami nee, ami nian produtu sira nee, ninia orientasaun nee ba deit tais, par abele hatudu ba mundu, tanba ita nian riku nee mak tais nee, tanba tais nee uniku, no laiha husi nasaun seluk neebe uja tais ida nee,” dehan nia.

Iha fatin hanesan, Deputy Diretor ETDA, Januario M.Neto Mok, hatete, konaba arte ninia, joven sira halo pintura mak barak, tanba ba organizasaun nee sira pinta hela ba kompetisaun nasional, maibe agora dadaun sira pinta hela sasan expo natal nian, nomos sira pinta hela dubai ninia.

“Ami iha kliente sira neebe mak dala ruma ami iha koneksaun iha Australia, maibe kuaze iha situasaun Covid-19 nian laran, ami la haruka sasan nee ba too iha nee, maibe uluk nee ami sempre haruka ba iha nee ba, atu nunee ami bele faan iha Australia, maibe dala barak ema mai sosa iha nee deit, tanba ami nian kliente sira hatene ona fatin ida nee, tanba sira mai iha ami nian loja arte para bele sosa produtu sira neebe ami produs, tanba ema barak hameno atu sosa, maibe depende ba sira hakarak hameno saida,” dehan nia.*

Reportajen: Jacinta Sequeira
Editora: Carme Ximenes

LEAVE A REPLY

Please enter your comment!
Please enter your name here