KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu publiku sira.

Ministru Prezidensia Konsellu Ministru (MPKM) Fidelis Leite Magalhaes katak, projetu dekretu lei neebe Konselu Ministru aprova nee, ho objetivu atu kria subsidiu mensal ba funsionariu publiku sira.

“Subsidiu ida nee hanesan produtu agrikola nasional, neebe sei fo ba funsionariu publiku sira ho objetivu permite hamenus despeza, ho akizisaun ba ai-han sira no konfesaun refeisaun sira, liu – liu atu promove akizisaun produtu agrikola sira husi produtor nasional, nomos atu insentiva aumentu produtividade setor agrikola nian,” dehan Ministru MPKM Fidelis Leite Magalhaes hafoin remata enkontru KM extra ordinariu iha Palasiu Governu, Dili, Segunda nee (20/09/2021).

Tamba nee, kada fulan funsionariu publiku sira sei hetan subsidiu ai-han hanesan foos 35 Kg nomos produtu lokal sira seluk.

“Fulan – fulan funsionariu publiku sira iha diretu ba foos 35kg, batar kilo lima, koto kilo lima, fore mungu kilo lima no fore keli kilo rua. Karik laiha produtu sira anterior balun neebe temi ona, bele troka ho produtu sira seluk ho valor hanesan. Sei entrega trimestralmente husi orgaun no servisu sira ba benefisiariu, neebe ezerse ninia funsaun,” dehan governante nee.

Fidelis dehan, hafoin KM aprova projetu dekretu lei nee, tuir mai sei haruka ba Prezidente Republika, Francisco Guterres “Lu Olo” hodi deside tuir dalan legal neebe mak iha.

“Proposta dekretu lei nee ohin governu foin aprova, no tuir mai sei haruka ba iha prezidensia Republika ba promulgasaun, neebe desizaun ohin KM deside nee parte governu nian hotu ona, maibe tanba tuir konstituisaun mak haruka fali ba iha Prezidensia repúblika hodi deside, no ida nee seidauk final, bainhira seidauk iha promulgasaun,” dehan porta voz governu.

Nia hatutan, bainhira dekretu lei hetan promulgasaun husi Prezidente Republika, mak sei tama iha vigor iha fulan Janeiru tinan 2022.*

Reportajen: Alberto Menezes

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 20 Outubru: Kazu Foun Hamutuk 16

DILI, STLNEWS.co - Ohin loron Sentru Integradu Jestaun Krize (SIJK) rejistu kazu foun hamutuk 16, iha Dili 14 no munisipiu seluk iha nain 2. "Kazu...

Membru F-FDTL Foun Ida Halai Lakon

DILI, STLNEWS.co - Membru foun FALINTIL Forsa Defeza Timor Leste (F-FDTL) ida ohin halai lakon iha sentru formasaun Metinaro tanba la augenta ho instrusaun...

Maromak La Dukur Ba Nia Ema

DILI, STLNEWS.co - Maromak mak iha kbiit tomak sempre akompanha ema hotu iha tempu saida deit no nunka dukur ba ema, tanba ne'e presiza...