DILI, STLNEWS.co – Knaar katekista nudar vokasaun ida, tanba ema barak la tuir dalan nee, Nai Maromak hili ema barak, maibe hili oituan deit hodi halao Nai nia misaun liu husi hanorin katekeze ba sarani sira.
Liafuan murak nee hatoo husi Katekista Feliciano dos Santos ba STL iha nia knaar fatin eskola Sao Domingos Savio, Baukau, Tersa nee (22/08/2023).
Nia dehan, knaar katekista refere halao iha parokia idak-idak, oinsa hatudu dalan ba ema seluk, fo formasaun no atividade konaba igreja nian, kolabora hamutuk ho Xefi katekista no Amu Paroku hodi halao knaar nee ba sarani sira iha moris loron-loron nia.
“Katekista nudar vokasaun ida, tanba ema hotu-hotu laos atu sai katekista, maibe Maromak nee nia planu bolu ema balun deit sai katekista, tanba katekista nudar vokasaun ida, ami hakarak tulun ema seluk hodi servi sarani sira,” dehan nia.
Nia dehan, iha tinan 1984 nee lao hamutuk Amu Rolando ba iha Parokia Laivai fo formasaun ba sarani sira, oinsa sira bele hatene Nai, nunee sira mos hakbesik ba Maromak iha loron Domingu iha eukaristia misa.
Tanba nee, senti kontenti ba vokasaun ida nee, sarani barak fo formasaun atu simu Sakramentu Batizmu, primeira komuniaun, Krisma sira bele hetan naroman.
(joa)
