DILI, STLNEWS.co – Implementasaun Konfinamentu Obrigatoriu (KO) funsionariu husi Administrasaun dos Porto de Timor Leste (APORTIL) lao normal, maibe balun la tama serbisu.
Kestaun nee hato’o husi tuir vogal I APORTIL IP, Jose Madeira Marques ba STL Sesta nee (27/08/2021) hatete, iha Konfinamentu Obrigatoriu, atividade hotu iha APORTIL lao hanesan babain, maibe kumpre nafatin regra husi protokolu Ministeriu Saude nian.
“Normalmente ita tama ba Serka Sanitaria (SS), Konfinamentu Obrigatoriu (KO) atividade APORTIL hanesan babain, sasan tama sai mos hanesan, maibe ita kompara hanesan loron babain ho Konfinamentu Obrigatoriu nee funsionariu barak mak la halao servisu, ita boot sira haree ho matan ema la tama, tanba transporte la halai, no balun mos tanba laiha atividade barak iha nee, entau kolega sira nee la tama, sira neebe mak tama servisu mak, sira neebe mak asina dokumentus importante sira,” dehan vogal I Aportil Jose Madeira.
Nia hatete, funsionariu balun la tama servisu, tanba laiha transporte tula sira, no balun la tama tanba atividade APORTIL balun la lao.
Nia akresenta liu tan, maske funsionariu balun tama servisu, maibe atividade iha APORTIL kontinua lao hanesan babain.
“Maske funsionariu balun la tama atividade lao nafatin ami fahe serbisu malu hodi lao nafatin,” dehan nia.
Iha fatin ketak kasual APORTIL, Luis Da Costa hatete, oras nee sira la tama servisu tanba ro’o mak la tama, tanba nee mak sira la tama.
“Ami hanesan kasual, tanba nee mak kuandu ro’o iha ami tama servisu, maibe kuandu ro’o laiha ami la tama servisu, no oras nee ami la tama tanba ro’o mak la tama,” dehan Luis.
Nia hatutan, karik ro’o tama sira halo servisu, no tama serbisu oras 12 nia laran hahu husi tuku 8 dader to’o fali tuku 8 kalan.
Tuir observasaun neebe mak STL hetan iha APORTIL Dili, maske oras nee governu implementa hela Konfinamentu Obrigatoriu, maibe ro’o Kontinua tama iha porto Dili hodi hatun kontainer sira, no atividade kontinua lao hanesan babain.*
Reportajen: Emerenciana Pinto/Jacinta Sequeira
Editor: Ekipa STL
