DILI, STLNEWS.co – Komando Polisia Nasional Timor Leste (PNTL) Munisipiu Dili sei hatun efetivus hamutuk 250, hodi asegura seguransa ba loron restaurasaun independensia loron 20 fulan Maiu neebe mak sei selebra iha Tasi Tolu.
Komandante Polisia Nasional Timor Leste (PNTL) Munisipiu Dili, Superintendente Xefi Polisia, Henrique da Costa informa, operasaun halo ona kordenasaun ho operasaun nasional, atu nunee bele hetan mos orientasaun ruma, no sira mos halo hela observasaun ba fatin serimonia neebe mak kompania prepara hela iha Tasi Tolu, atu nunee hodi realiza serimonia loron 20 fulan Maiu nian.
“Ita nia efetivu agora nee iha atus 516, no ida neebe mak ita hakarak atu hatun hodi asegura seguransa ba loron 20 fulan Maiu nee, ita sei hatun metade husi ida nee hamutuk ema 250 hodi asegura seguransa,” dehan nia ba jornalista sira iha nia knaar fatin, Kaikoli, Dili, Kinta nee (28/04/2022).
Nia dehan, sira nia ekipa mos koloka iha estrada terminal Tasi Tolu nian, hodi asegura movimentu transporte no mos ema lao ain iha neeba, tanba agora daudaun iha neeba halo hela konstrusaun, entaun sira presiza asegura iha neeba, nunee servisu nee bele lao lalais.
(efi)
