Komandu F-FDTL Tenke Iha Kbiit

Prezidente Republika, Francisco Guterres Lú Olo hatete, lideransa ba Komandu Falintil Forsa Defeza Timor Leste (F-FDTL) tenke iha kbiit no kapasidade halao knaar iha estrutura laran. (Foto: STL/Emerenciana Pinto)

DILI, STLNEWS.co – Prezidente Republika, Francisco Guterres Lú Olo hatete, lideransa ba Komandu Falintil Forsa Defeza Timor Leste (F-FDTL) tenke iha kbiit no kapasidade halao knaar iha estrutura laran.

Xefe Estadu hatutan, vizaun konaba Forsa Armada ida neebe prontu no ho naran-morin hodi serbi Timor-Leste no seguransa ema hotu-hotu ninian, ezije katak Forsa nee tenke hamriik ho ema neebe kompetente no prontu atu serbisu ho laran-haksolok, lidera hosi lider hirak neebe hatene inspira sira no hakoak ema hotu, lider sira neebe bele kontribui ba hasae militar ida-idak ninia nivel dezempenu no satisfasaun profisional, no fo dalan ba ema ida-idak bele afirma ninia an.

“Estrutura lideransa ba Komandu F-FDTL no Ofisial Jeneral sira-neebe halo parte hosi estrutura hirak-nee tenke iha kbiit atu hatan ba dezafiu ida-nee no mudansa sira-nee, no tenke iha mos kapasidade no preparadu atu halao knaar neebe deit iha estrutura laran, laos deit iha komponente fiksa maibe mos iha komponente operasional hosi Sistema Forsas Nasional. Nunee mos, sira tenke prepara an, liu liu domina lia-inglés, hodi kaer knaar reprezentasaun nasional iha organizasaun internasional sira, ka komanda ka halo parte hosi estrutura komandu forsa multinasional sira-nian iha ambitu misaun apoiu ba paz,” dehan Xefe Estadu liu husi diskursu, iha Palasiu Prezidente Nicolau Lobato, Bairru Pite, Dili Sesta (26/02/2021).

Aman ba nasaun nee afirma, iha tempu ida neebe FALINTIL-Forsas Defeza Timor Leste sei simu tan responsabilidade boot iha rai-laran no iha rai-liur, no tanba instituisaun iha hela faze restruturasaun interna. Tenke hili duni ba ofisial jeneral, ofisial sira-neebe kompetente liu, ho kualifikasaun tekniku-profisional, esperiensia no kapasidade komandu, iha rekonesimentu no prestijiu iha meiu militar ka sivíl hodi hasoru dezafiu sira-nee.

Nuudar Komandante Supremu Forsas Armadas, hafoin simu proposta husi Konsellu Ministrus, iha kompetensia rasik atu halo promosaun militar sira-nian ba postu ofisial jeneral no promosaun ofisial jeneral sira-nian.

Nunee, justu teb-tebes Komandante Supremu fo rekonesimentu publiku iha serimonia ida-nee, ho distintivu Ofisial Jeneral ba Jeneral foun sira FALINTIL-Forsas Defeza Timor-Leste ba sira-nia esforsu no dedikasaun tomak iha misaun sira neebe ida-idak simu, hosi hori uluk too ohin loron.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here