Komemora 28 Novembru, PR Esklarese Impase Politika Ba Povu

Komemorasaun Proklamasaun Indepedensia Ba Dala 45 iha Munisipiu Liquica, iha biban nee Prezidente Republika Francisco Guterres Lú Olo esklarese impase politika neebe mak akontese iha rai laran ba povu sira. (Foto: STL/Donaciano Magalhães)

LIQUICA, STLNEWS.co – Komemorasaun Proklamasaun Indepedensia Ba Dala 45 iha Munisipiu Liquica, iha biban nee Prezidente Republika Francisco Guterres Lú Olo esklarese impase politika neebe mak akontese iha rai laran ba povu sira.

Prezidente Republika Francisco Guterres Lú Olo liu husi nia diskursu bainhira komemora 28 Novembru ba dala 45 iha munisipiu Liquica, Sabado (28/11/2020) katak iha biban nee nia mos esklarese impase neebe mak akontese maibe bazeia ba konstituisaun.

PR hatete krize boot ida akontese iha 2006, ida seluk iha 2017 dada too 2018 enkuantu FRETILIN kaer ukun. Krize ikus liu mosu iha final 2019 no dada too 2020 enkuantu AMP mak kaer ukun. Responsavel Orgaun Soberania sira-nian xoke malu no relasaun ba malu suspende ka hakotu.

“Krize polítika neebe mosu iha 2006 tabik kedas ho kilat tarutu entre PNTL no FALINTIL-FDTL no ema sunu uma no oho ka ataka ema arbiru deit. Ita-nia ema barak lakon uma no sasan no sai ema deslokadu internamente (ka konesidu liu ho naran “Refujiadu”) iha fatin-fatin ho kondisaun aat tebes durante fulan barak. Instabilidade sosiál boot tebes iha krize 2006. Risku atu sai guerra sivíl aas tebes. Tanba nee, Primeiru-Ministru husu rezignasaun atu hasees risku raan fakar dala ida tan iha ita-nia rai doben. Krize nee hatudu relasaun ladiak entre líder sira no entre orgaun Soberania no hamosu krize sosial maibe ita la tama iha krize institusional grave tanba Parlamentu Nasional, Governu, Prezidente Republika, Tribunál sira no instituisaun sira Estadu nian halao hela sira-nia knaar tuir konstituisaun haruka.” hatete Lú Olo.

Aman nasaun nee hatutan iha fali 2017, dala ida tan akontese krize polítika maibe ho impaktu aat boot ba Estadu Direitu Demokratiku. Hafoin rezultadu eleisaun fo-sai, Prezidente Republika konsulta kedas ho partidu polítiku sira no ho líder balu hafoin hetan garantia katak sei iha opozisaun konstrutiva iha Parlamentu Nasional, Xefe Estadu fo kbiit ba partidu FRETILIN kaer ukun tinan lima, nuudar vensedor eleisaun 2017. Maibe husi diferensa polítika neebe mosu entre partidu sira, iha Parlamentu Nasional, mosu konflitu boot entre maioria pos-eleitoral halo opozisaun iha Parlamentu Nasional no Governu.

Parlamentu Nasional la funsiona hanesan bainbain no Governu la konsege halao ninia knaar tuir konstituisaun haruka. Komunikasaun entre Parlamentu Nasional no Governu kotu. Haree ba situasaun konflitu boot tebes no tama ona iha krize institusional ida ke grave tebes, Prezidente Republika deside disolve ka hakotu Parlamentu Nasional no konvoka eleisaun jeral antesipada.

Tanba AMP mak manán eleisaun jerál antesipada, Prezidente Republika bolu aliansa nee hodi forma Governu. Maibe iha governasaun klaran mosu fila fali konflitu boot entre partidu sira neebe halo parte iha AMP.

Biar partidu sira iha Parlamentu Nasional xumba Orsamentu Jeral Estadu 2020, Governu sei halao hela ninia knaar baibain hela ho apoiu husi partidu rua husi AMP rasik no husi partidu opozisaun FRETILIN.

“Povu doben Timor-Leste, permite mai hau iha loron ida ohin atu esklarese diak liu-tan kona-ba situasaun polítika ka impase polítika iha ita-nia rai laran. Konaba ida nee hau prefere koalia tuir saida mak Konstituisaun hateten no hakerek ho lia-fuan ho nia sentidu juridiku konstitusional. Wainhira koligasaun prée-eleitora i ka pos-eleitorál ida neebe mak sustenta Governu rahun, nee la signifika katak automatikamente Governu nee monu ona no tenke forma fali Governu foun. Koligasaun rahun laós fundamentu ida atu halo kedas ona demisaun ba Governu. Situasaun hirak neebe mak implika demisaun Governu so situasaun hirak neebe mak temi iha artigu 112 Konstituisaun. Wainhira la mosu situasaun ruma neebe mak temi iha artigu 112 Konstituisaun, Governu kontinua ninia knaar ho kbiit tomak.” hatete Lú Olo.

Aman nasaun nee dehan uluk wainhira partidu CNRT la sustenta ona VIII Governu no ba hamutuk ho partidu sira seluk neebe iha asentu parlamentar hodi estabelese koligasaun foun ida ho objetivu atu forma IX Governu, VIII Governu nee sai tiha Governu minoritariu. Maske halao knaar nuudar Governu ida neebe minoritariu iha momentu neeba, VIII Governu kontinua iha ninia kbiit kompletu.

“Ita-nia Konstituisaun la bandu ejistensia Governu minoritariu. Governu minoritariu bele mosu iha momentu inísiu lejislatura foun mos bele akontese durante lejislatura ida nia laran. Nee katak hahu hosi momentu formasaun Governu, minoria nee hahu kedas ona hosi inísiu mandatu governativu (hanesan akontese ba VII Governu). Bele mos mosu Governu minoritariu wainhira koligasaun maioritaria ruma naksobu iha dalan klaran (hanesan akontese ba AMP neebe mak mosu iha eleisaun lejislativa 2018). Ita-nia norma konstitusional sira kona-ba formasaun no demisaun Governu, kuaze hanesan kedas ho norma konstitusional Portugal nian. Iha Portugal ejiste ona Governu minoritariu oioin. Konstitusionalista boot sira-nia obra doutrinaria iha Portugal la dehan katak Governu minoritariu nee inkonstitusional.” afirma nia.

Nunee mos uluk atual Primeiru-Ministru hatama pedidu demisaun ba Prezidente Republika no too ikus Primeiru-Ministru rasik dada fila fali ninia pedidu demisaun nee ho razaun tanba mosu situasaun kalamidade publika no emerjensia neebe mai hosi kalamidade nee, no mos situasaun polítika no ekonomika difísil iha rain laran, presiza kontinuasaun kontribuisaun nuudar Primeiru-Ministru.

Nunee mos yuir konstituisaun, Prezidente Republika laiha obrigasaun atu aseita Primeiru-Ministru nia pedidu demisaun. Artigu 112, númeru 1 Konstituisaun estabelese kondisaun balu kona-ba oinsa Governu bele hetan demisaun. Kondisaun ida neebe mos hamosu demisaun Governu mak aseitasaun prezidensial ba pedidu demisaun hosi Primeiru-Ministru.

Hafoin Prezidente Republika aseita pedidu demisaun Primeiru-Ministru nian mak Governu foin hetan demisaun. Karik Prezidente Republika la aseita Primeiru-Ministru nia pedidu demisaun, Governu kontinua halao ninia knaar hanesan baibain.

Hatutan pajina 2

LEAVE A REPLY

Please enter your comment!
Please enter your name here