Komemora Proklamasaun Independensia, Partisipasaun Populasaun Menus

DILI, STLNEWS.co – Selebrasaun loron Proklamasaun Independensia 28 Novembru ba dala 48, partisipasaun populasaun menus, maski nunee ambiente no situasaun lao hakmatek.

Preokupasaun nee hatoo husi Akademiku, hanesan mos Prezidente Ezekutivu Fundasaun Cristal, Agustinho dos Santos Gonsalves katak, ohin serimonia komemorasaun loron proklamasaun independensia ba dala 48, lao diak, maibe tinan oin mai halo komemorasaun presiza konvida mos parte akademiku sira, nomos komunidade sira hotu, inklui funsionariu sira hotu, nunee partisipasaun sidadaun sira masimu iha komemorasaun sira hanesan nee.

“Komemorasaun loron istoriku sira hanesan nee Prezidente Republika mos hatoo mensajen, tanba nee partisipasaun sidadaun hotu importante, tanba loron boot sira hanesan nee laos ba deit lideransa sira ka VIP sira, maibe importante mos ba sidadaun hotu, tanba nee povu tenki mai atu selebra hamutuk”, katak Akademiku hanesan mos Prezidente Ezekutivu Fundasaun Cristal, Agustinho dos Santos Gonsalves ba STL, Tersa nee (28/11/2023), iha Palasiu Prezidensial, Aitarak Laran.

Nia rekomenda, karik loron importante sira hanesan nee, ba oin selebra fali presiza halo iha fatin publiku sira hanesan estadiun ka iha fatin publiku sira seluk, nunee populasaun hotu, hahu husi kiik too ferik katuas, juventude sira partisipa.

Tuir nia, selebra iha Palasiu Prezidente nee mos bele, maibe partisipa nee konvidadus sira deit, maski populasaun balu mos ladun masimu, tanba haree ba kadeira barak mos sei mamuk.

(gui)

LEAVE A REPLY

Please enter your comment!
Please enter your name here