Komemorasaun Loron F-FDTL Sei Halo Simbolika Deit Tamba Covid-19

Komemorasaun loron FALINTIL Forsa Defeza Timor Leste (F-FDTL) ba dala 20 neebé monu iha loron 2 Fevereiru sei la realiza ho eventu boot maibe simbolika deit tanba Covid-19. (Foto: Media PR)

DILI, STLNEWS.co – Komemorasaun loron FALINTIL Forsa Defeza Timor Leste (F-FDTL) ba dala 20 neebé monu iha loron 2 Fevereiru sei la realiza ho eventu boot maibe simbolika deit tanba Covid-19.

Kestaun nee hatoo husi Xefe Estadu Maior FALINTIL Forsa Defeza Timor Leste (F-FDTL) Maijor Jeneral Lere Anan Timur ba jornalista, bainhira remata hasoru malu ho Prezidente Republika Francisco Guterres Lú Olo iha Palasiu Prezidente, Bairru Pite, Kuarta (06/01/2020).

“Komemorasaun ita hotu-hotu hatene loron 02 Fevereiru loron F-FDTL ninian ba dala 20, dala ruma seremonia boot la halo, maibe simbolikamente bele halo no momentum neeba bele iha eventus barak hanesan seminariu, lansamentu livru, promosaun, kondekorasaun buat sira nee bele halo,” hatete Major Lere.

Komandante nee hatutan kumpre orden estadu ninia dehan labele konsentrasaun liu ema nain 10, agora konsentrasaun liu ema nain 10 dala ruma interpreta, hanesan polítika sira koalia arbiru deit la hanoin no la estuda maka koalia.

Tamba hanesan insitituisaun F-FDTL laos nain 10 deit maibe dala ruma atus ka rihun ida nee mos bandu labele hamutuk ka neeba nee iha ona uma ida nia laran, hanesan familia ida kompostu 20-30 nee mos tenke fahe ba 10 ka nee familia ida.

Major Lere hatutan ema 10 nee labele ema mai husi liur, mai husi fatin-fatin nee maka labele nain 10 nee agora ema fen laen 10 resin mos tenke fahe fali ba 10, nee hanoin katak ema bainhira kritika nee tenke hanoin didiak labele kritika deit, maibe Lere dehan katak ida nee demokrasia ema hotu-hotu koalia ninia.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here