Komisaun Instaladora Atauro Hasoru PR

Prezidente Republika, Francisco Guterres Lú Olo. (Foto: Media PR)

DILI, STLNEWS.co – Komisaun Instaladora Desterradu Atauro ho ekipa, hasoru malu ho Prezidente Republika Francisco Guterres Lú Olo, hodi kolia kona ba re organiza fila fali desterradu atauro hodi kontribui ba dezenvolvimentu iha rai laran.

Koordenador Komisaun Instalador Atauro, Agostinho Grigorio Ramos ba jornalista, iha Palasiu Prezidente Nicolau Lobatu, Bairru Pite, Dili, Segunda (14/12/2020) hatete, ohin reprezenta desterradu iha timor laran tomak hasoru PR iha biban nee PR hatoo ondra ba Grupu refere.

“Ohin mai reprezenta desterradu hotu neebe mak namkari iha Timor laran tomak, destera Atauro 87 Mill no ekipa ida nee hetan ondra boot husi Prezidente Republika, simu ami nia pedidu ami halo audensia iha fatin ida nee, Komisaun ida nee hamriik atu re organiza fila fali desterradu atauro atu valoriza fila fali ita nia desterradu Atauro, atu bele kontribui hametin istoria atu bele kontribui ba dezenvolvimentu timor lorosae” hatete Koordenador nee.

Nia hatete, iha hasoru malu nee PR mos apresia ba sira nia planu no programa neebe mak iha ba Kongresu Nasional nia.

“Ohin Prezidente Republika simu ami ho diak no apresia planu no programa neebe mak iha katak, halo preparasaun ba kongresu planu nasional iha tinan oin mai, iha oportunidade ida nee mos hau aproveita uja atu apelu ba ami nia desterradu hotu, komisaun instaladora desterradu hotu hamriik no establese ona iha Dili hahu iha 23 Febreiru 2020,” nia hatete.

Agostinho hatutan tarefa servisu sira distribui ona ba munisipiu hotu liu husi fokal point hotu neebe mak indika iha kada munisipiu, tanba desterradu Atauro neebe mak halo iha 1980 no 1983 ba familia sira neebe mak liga ba falintil sira no liga ba gerileiru sira, iha tinan 87 no prosesu ida nee mak sira sei halo, no prosesu ba oin sei halo kongresu ida.

“Ami apelu mos ba eis desterradu hotu iha idak idak nia munisipiu, iha idak idak nia postu iha tempu badak nia laran komisaun central, sei tun iha munisipiu idak idak atu bele re organiza atu prepara ba kongresu nasional iha tinan oin mai,” katak nia.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here