Kompania Depende Projetu

Ofisial Programa AJAR, Inocencio de J. Xavier. (Foto: STL)

DILI, STLNEWS.co – Durante nee, kompania nasional, internasional depende deit ba projetu husi governu. Tanba nee, bainhira governu laselu projetu, afeita mos ba traballador neebe servisu iha kompania sira nee.

Tuir Ofisial Programa AJAR, Inocencio de J.Xavier, kompania nasional ho internasional hirak neebe investe iha timor-Leste durante nee, depende liu ba projetu. Tanba nee, bainhira projetu sira nee laselu, ninia impaktu mos ba traballador sira neebe durante nee servisu iha kompania. Traballador sira hetan osan bainhira governu selu kompania, foin kompania bele selu ba ninia traballador sira.

“Ita koalia kona-ba sentu quarenta sete projetu nee seidauk, siqnifika kompania barak tama iha nee. Sira deve banku, oras nee ninia funan sae makas, husi ida nee afeita ba traballador neebe servisu ba projetu sentu quarenta tres (143),” katak Ino ba STL iha nia knar fatin Farol Dili, Kuarta (14/10/2020).

Ho situasaun nee, katak Ino, agora haree dadaun afeita ona ba ema nia ekonomia. Tanba too agora husi kompania nasional no internasiinal hein deit projetu. Agora projetu laselu, oinsa atu kompania bele selu fali vensimentu traballador nian enkuantu governu laselu kompania.

Tanba durante nee setor privadu sira sei nafatin depende ba projetu mai husi governu. Tanba setor privadu sira, sei depende nafatin ba projetu husi governu. Maibe projetu balun too agora parte governu seidauk selu, nee afeita mos ba traballador sira, tanba kompania laiha osan atu selu ninia traballador.

Maski nunee, tuir Direitor Ezekutivu SERVE, Florencio Sanches katak, nian fiar emprezariu sira sei ladepende ba konkursu publiku ou sei ladepende ba projetu sira, tanba projetu nee bainhira remata,nee hotu ona.

“Hau fiar seim pursentu ona katak, emprezariu sira ladepende ona ba konkursu publiku, sira ladepende tebes ona ba projetu sira nee. Tanba projetu nee bainhira hotu, hotu ona, maibe kuandu imprezariu ida depende ba nia kapasidade fiar katak bele moris,” katak Florencio.

Direitor SERVE, Florencio akresenta, kompania internasional balun husi Amerika, Australia no Xina, sira haruka ona pedidu mai SERVE katak, sira atu mai halo investimentu iha Timor Leste (TL). Maske agora iha situasaun covid-19 nia laran, maibe kompania nasional sira mos kontinua mai rejistu foun, balun mai renova sira nian dokumentus.*

Reportajen: Jacinta Sequeira/Madalena Horta
Editor: Ekipa STL

LEAVE A REPLY

Please enter your comment!
Please enter your name here