Komunidade La Hakmatek, PNTL Sei Garante Seguransa

Segundu Komandante Polisia Municipiu Dili, Superintendente Asistente Polisia, Euclides Belo. (Foto: Espesial)

DILI, STLNEWS.co – PNTL husu ba komunidade atu labele konsumu alkohol, hodi hamosu situasaun hirak neebe maka halo komunidade la hakmatek, liliu iha tempu estadu emerjensia, tanba polisia sei la tolera ho atitude hirak nee.

Liafuan nee haktuir husi Segundu Komandante Polisia Municipiu Dili, Superintendente Asistente Polisia, Euclides Belo, ba jornalista sira iha Komando Municipiu Dili, Caikoli, Segunda (08/03/2021).

Nia haktuir kestaun nee hodi responde komunidade nian konaba atendementu PNTL nian neebe tarde, bainhira akontese asidente asaltu iha Bairru Ourivas, Aldeia Temporal, Suku Lahane, Postu Administrativu Nain Feto, Municipiu Dili, neebe maka rezulta mane ida kanek no familia matebian nia sasan hetan estragus.

Segundu Komandante nee hateten, husu ba joven sira atu labele halo problema arbiru hodi hamosu desestabilizasaun. Tanba liu husi problema nee bele implika ba komunidade sira la hakmatek, dala ruma atendementu parte polisia nian ba iha kualker insidente, tantu asidente ruma nee kadaves tarde 5 minutus ou 2 minutus.

“Se maka halo problema karik komunika mai iha PNTL, atu loron ka kalan mos ami sei ba buka tuir, tanba halo komunidade la hakmatek nee, halo komunidade la gosta,” nia dehan.

Nia hatutan, ba komunidade sira neebe maka hela iha area Munisipiu Dili atu bele koopera ho servisu PNTL nian, tanba nee se kuandu iha problema ruma bele komunika mai iha PNTL. Iha situasaun estadu emerjensia nee husu atu labele konsumu alkohol arbiru, no halo atividade neebe maka sei fo perigu ba ema seluk, tanba parte PNTL sei la tolera ho asaun hirak nee.*

Reportajen: ESTDE
Editora: Domingas Gomes

LEAVE A REPLY

Please enter your comment!
Please enter your name here