LAUTEM, STLNEWS.co – Komunidade Suku Serelau, Aldeia Adavari, Postu Administrativu Lautem, Munisipiu Lautem, sei kontinua halerik bee moos, maski governu liu husi NGO Farterna halo ona kanalizasaun bee, maibe bee moos seidauk bele uza tanba paralon mota husi Suku Serelau mai estraga hotu.
“Analiza Bee ONG Fraterna instala ona, maibe agora abandona hanesan nee, bee la sai, tanba paralon iha dalan ninin aat hotu, tanba nee komunidade sei kontinua halerik bee moos,” hatete Belita dos Santos ba STL iha Aldeia Adavari, Dominggu (09/07/2023).
Nia dehan, Aldeia Adavari durante Indonezia nia tempu too mai Timor ukun aan, komunidade seidauk asesu bee moos, tanba nee sira ho gerobak lao dook mak foin kuru bee hodi mai uza ba konsumu no atende ba nesesidade baziku.
“Bee uluk ONG Fraterna mak mai halo instalasaun hahu husi Suku Serelau too mai iha Aldeia Adavari nee, maibe bee la sai too agora, tanba sira mai halo kanalizaun deit, bee seidauk sai sira husik deit hanesan nee, entaun tanki sira nee la uza, tanba bee laiha,” nia esplika.
Iha fatin hanesan, Komunidade Aldeia Adavari Manuel da Costa informa, sira iha fatin ida nee kontinua halerik bee moos, hahu husi Indonezia nia tempu too Timor ukun aan, tanba sira loron-loron lao 7 kilomertu depois mak kuru bee moos.
“Ami lao distansia 7 kilomertu foin mak ami kuru bee moos hodi mai tein no uza ba haris, tanba nee ami semana ida haris dala ida, tanba kuru bee ho distanisa neebe dook tebes,” nia informa.
Nia deklara, iha Aldeia Adavari ninia komunidade persiza tebes bee moos, tanba nee husu ba IX Governu tau importansia ba probelma bee moos, tanba sira seidauk senti ukun rasik aan.
“Ami seidauk senti Timor ukun aan, ami estrada ibun maibe ami sei halerik bee moos, tanba nee ami seidauk senti dezenvolvimentu ida nee,” nia hatutan.
(jen)
