DILI, STLNEWS.co – Hela tan loron sanulu resin ida (11), Timor Leste komemora loron restaurasaun independensia ba dala XX, tanba nee autoridade lokal sira oriente komunidade sira tenki hasae Bandeira Republika Demokratika Timor Leste (RDTL) iha idak-idak nia uma oin.
Kestaun nee hatoo husi Xefi Suku Komoro, Eurico da Costa de Jesus ba STL husi telefone, Segunda nee (09/05/2022).
“Ami orienta tiha ona iha semana kotuk, hotu-hotu hasae Bandeira RDTL, tanba nee ami lao ba aldeia idak-idak para tenki hasae bandeira iha uma oin,” nia dehan.
Nia esplika, iha populasaun sira balu seidauk hasae Bandeira RDTL iha idak-idak nia uma oin, maski autoridade lokal sira fo ona avizu iha semana kotuk, tanba nee iha area Tasi Tolu, Aimutin, sira komesa hasae ona bandeira.
Iha fatin hanesan, Maria Banca dos Santos nudar komunidade Suku Komoro, informa, sira seidauk hasae bandeira, tanba bandeira la iha, maibe sira sei sosa ida hodi hasae iha uma oin.
“Ami seidauk hasae bandeira, tanba ami nia bandeira la iha, maibe hanesan Timor oan no komemora loron 20 fulan Maiu nee ita tenki kumpri hodi hasae, ami sei hola ida hodi hasae iha uma oin,” nia informa.
Nia afirma, konaba avizu husi Xefi Suku no Xefi Aldeia sira too ona iha sira nia tilun, maibe seidauk hasae, tanba bandeira mak la iha, maibe hein loron besik mak hasae.
(jen)
