Komunidade Viola Regras Transfer Sasan

Foto: BeritaSatu

DILI, STLNEWS.co – Tuir delegadu Suku Comoro, Anacleto Moniz, hatete komunidade sira neebe halo transfer sasan iha zona serka sanitaria Tasi-tolu sempre viola regras ka oras neebe determina ona iha lei implementa serka sanitaria nian, tanba ho situasaun nesesidade nian.

Delegadu nee hatete, situasaun iha JP Tasi-tolu lao normal tuir regras neebe maka iha lei, no seguransa sira neebe halao servisu iha fatin nee mos tuir lei neebe maka iha, kuandu lei bandu dehan iha oras hanesan nee labele lori sasan tama, tenke tuir lei nee labele duni.

Tanba oras neebe fo ba komunidade ka ema hotu atu halo transfer sasan husi Dili ba foho ka, husi foho mai Dili hahu husi dader tuku 9 too tuku 4 liu lorokraik, entaun bainhira liu ona oras tuku 5 nee sasan labele tama ona.

“Maibe ita haree ba iha realidade komunidade sira sempre viola, tanba koalia konaba komunidade nee, kona ba ema barak. Entaun ema sira neebe mai husi foho ladun hatene situasaun nee oinsa, no tanba nesesidade halo sira mai deit maske liu ona oras Neebe determina,” dehan nia ba STL iha Tasi-tolu, Sabado (20/03/2021).

Nia hatutan, komunidade sira neebe lori sasan hanesan modo ho sasan seluk neebe too iha nee tama tarde maibe, sasan konsege fo tama mak halo ona transfer husi kareta mai husi Munisipiu Likisa ho Ermera ba fali kareta husi komunidade sira neebe iha Dili i ema mak labele tama.

Tuir observasaun jornalista STL iha terrenu katak, sasan neebe maluk komunidade sira lori mai husi Munisipiu Likisa ho Ermera atu halo transfer sasan ba iha familia sira iha Dili, konsege seguransa sira autoriza fo tama duni maske liu ona oras, tanba mosu kritika husi komunidade sira.*

Reportajen: Domingas Soares
Editora: Ekipa STL

LEAVE A REPLY

Please enter your comment!
Please enter your name here