Kondisaun Saúde La Permite, PM Taur Labele Partisipa Komemorasaun Loron FALINTIL Ba Dala 45

Primeiru Ministru (PM) Taur Matan Ruak, ohin labele partisipa iha selebrasaun loron FALINTIL ba dala 45, tanba ho kondisaun saúde ne'ebé la dun diak. (Photo: STL News)

DILI, STLNEWS.co – Primeiru Ministru (PM) Taur Matan Ruak, ohin labele partisipa iha selebrasaun loron FALINTIL ba dala 45, tanba ho kondisaun saúde ne’ebé la dun diak.

Tuir Ministru Prezidénsia Konsellu Ministrus (MPKM), Fidelis Manuel Leite Magalhães hateten, Primeiru Ministru (PM) Taur Matan Ruak ohin labele marka prezensa iha komemorasaun loron FALINTIL ba dala 45, tanba kondisaun saúde la dun diak.

“Excelensia Primeiru Ministru iha impedimentu oituan tanba moras hela, tanba ne’e ohin labele marka prezensa iha komemorasaun loron FALINTIL ba dala 45 nee,” dehan Ministru Prezidénsia Konsellu Ministrus (MPKM), Fidelis Manuel Leite Magalhães, iha Kuartel Jeral, Fatuhada, Dili, Kinta (20/08/2020).

Fidelis dehan, maske Xefe Governu labele marka iha prezensa iha komemorasaun loron FALINTIL ba dala 45 ne’e, maibe iha Vise Primeiru Ministru nain rua lidera Membru VIII Governu, marka sira nia prezensa iha komemorasaun ne’e.

“Membru governu sira partisipa hotu, no Vise Primeiru Ministru nain rua iha ne’e, inklui mos ministru ne’ebé tau matan ba iha asuntu kombatentes Libertasaun Nasional no ida fali konaba defeza,” nia esplika.

Tanba ne’e membru VIII governu fo parabens, no apresiasaun ba luta no sakrifsiu hotu ne’ebé mak durante asuwain FALINTIL sira halo iha tinan 24 nia laran.

“Ita partisipa iha ne’e hodi apresia ho sakrifsiu hotu ne’ebé mak ita nia jerasaun anterior sira halo, liu-liu ba funu nain FALINTIL sira ne’ebé mak mantein nafatin espiritu ba ukun rasik an durante okupasaun tomak,” hakotu nia.

Reportajen: Alberto Menezes

Editor: Ekipa STL

LEAVE A REPLY

Please enter your comment!
Please enter your name here