Konfrontasaun Iha Suku Afaloikai-Babulu, Rezulta Vitima Nain 5 Kanek

DILI, STLNEWS.co – Konfrontasaun neebe akontese iha loron 24 Dezembru tinan nee, iha Munisipiu Vikeke, Postu Administrativu Uatulari, Suku Afaloikai ho Suku Babulu, rezulta vitima nain 5 hetan kanek no igreja ho komunidade nia uma balun hetan estragus.

Xefi Suku Afaloikai Cesario Nasimento Pires informa, konfrontasaun mosu iha Uatulari antigu ho Babulu, komandante husi Vikeke haruka nia membru sira destaka mai iha nee, hodi ajuda polisia Eskuadra Uatulari para atua situasaun ida nee.

“Iha fatin akontesementu nee iha Suku Afaloikai nian nee iha nain ida mak kanek grave agora iha hela hospital Baukau, depois katekista nee mos hetan tuda iha nia hirus matan ho fatuk boot, neebe dala ruma sei lori ba Dili hodi hasai x-ray, no iha mos labarik mane ida hetan kanek iha parte ulun, depois vitima husi Suku Babulu nia nee iha labarik ida mos hetan kanek iha ulun nomos ida ain tuur mak kanek. Neebe iha konfrontasaun nee iha ema nain 5 mak kanek, agora sira hetan ona tratamentu hotu,” dehan Xefi Afaloikai ba STL liu husi telefone, Tersa nee (26/12/2023).

Nia dehan, polisia sira lori komunidade nain 3 husi Suku Afaloikai nia naran mai hatudu hodi husu xefi suku konhese sira nee ka lae, entaun sira nain 3 nee polisia foti ona mai iha eskuadra Darabai.

“Iha loron 25 Dezembru nee hau sae fila-fali ba, hau buka para atu hatene problema nee nia hun, entaun problema nia hun nee mai husi labarik sira tiru petasan nee, tanba grupu ida soe petasaun nee soe tama fali ba grupu ida neeba, no grupu ida neeba mak soe tama fali ba grupu ida seluk, tanba sira nia petasan ida neebe mak ho 8 shut nee, hodi se kedas ba malu. Ho ida nee mak halo provokasaun, entaun hamosu problema nee,” dehan nia.

“Iha loron 24 kalan nee, hau rasik mak haruka komunidade sira iha Suku Afaloikai halo seguransa iha igreja, hodi sori labarik sira neebe mak halo problema, maibe iha grupu balun la gosta, entaun simu hasoru sira, neebe iha momentu nee kedas ema barak mak tama ona hodi tula malu,” nia tenik.

Nia haktuir, vitima husi Babulu ho Afaloikai nee iha hotu kedas, vitima husi Afaloikai nian agora daudaun halo hela tratamentu iha Hospital Baukau, tanba kanek grave, depois igreja mos rahun no kadeira sira iha igreja laran mos rahun hotu, nee iha loron 24 fulan Dezembru.

Aleinde nee, komunidade sira iha Suku Babulu taa kotu hotu tiha ona kanu bee nian, neebe mak tun mai Suku Afaloikai, komunidade sira husi Aldeia Buibela, Lena, Uatu-ita, Kaitau nomos Kailake sira uza nee sira taa kotu tiha ona, neebe agora nee komunidade sira iha Uatulari antigu nee la asesu ona ba beee moos.

“Iha loron 25 dadersan, bainhira hau ba presta deklarasaun iha Darabai, no polisia eskuadra ba iha Uatulari antigu atu foti dadus iha fatin akontesimentu nee, foti dadus konaba uma ho igreja no ema neebe mak involve iha konfrontasaun nee, maibe grupu sira husi Babulu tun fila-fali mai hodi seran fali polisia sira, no tuda komunidade sira nia uma no tuda igreja protestan hotu, maibe polisia ho FDTL sira atua mak sira fila fali ba Babulu,” nia dehan.

Nia akresenta, depois iha mos komunidade husi Aldeia Buibela ninian, ema deskonhesidu mos sunu tiha ninia lutu toos nian, kuda mos ema dada lakon hotu ona, neebe hau agora haruka ona ba eskuadra Polisia Darabai para halo keixa iha neeba, horiseik nee ami ho polisia sira atua too lokraik mak fila.

Nia haktuir, akontese problema entre Suku Afaloikai ho Suku Babulu nee dala barak ona akontese hela deit, iha Xefi Suku sira antes nee mos rezolve ona maibe laiha solusaun ida diak para bandu populasaun sira labele halo hela deit problema nee, nee mak too ohin loron ema la tauk, kontinua halo problema ida nee.

“Agora daudaun hau koko tenta hela Xefi Suku Babulu nee atu rezolve ho maneira oinsa, primeiru koalia tuir familia, tanba suku rua nee suku vizinhu, neebe koko atu koalia tuir kultura nian, se kultura nian mak laiha solusaun, entaun lori ba lei nian, maibe agora nee koko hela atu rezolve uluk tuir kultura ninia lai, tanba suku rua nee ligasaun familia hela, maibe ho emosional entaun hamosu problema nee, neebe koko rezolve uluk tuir kultura lai,” tenik nia.

Iha 24 kalan nee kaer ona joven balun ba halo deklarasaun, maibe seidauk hatene lo-loos konaba se mak suspeitu, tanba iha akontesimentu iha kalan nee grupu ho grupu, neebe seidauk hatene los se mak suspeitu, tanba iha kalan nee labarik sira mak sunu petasan nee mak hodi mosu problema, neebe seidauk hatene los, tanba akontese iha kalan, neebe seidauk identifika lo-loos, sei rekolha hela dadus.

(nat)

LEAVE A REPLY

Please enter your comment!
Please enter your name here