DILI, STLNEWS.co – Projetu konstrusaun Uma Kbiit Laek (UKL) iha Suku Obulo, Postu Administrativu Atsabe, Munisipiu Ermera, hetan uma 9 no nia kontsrusaun too 75%, fiar katak tempu besik sei finaliza no bainhira tama ba Novembru tinan ida nee bele entrega ona.
“Programa Uma ba Kbiit Laek iha suku ida nee hetan uma 9, prosesu konstrusaun lao hela, atinjI ona 75%, tanba tuir kontaratu neebe halo ho kompanHia katak, iha fulan Novembru tinan ida nee tenki hotu ona,” lia hirak nee fo sai husi Autoridade Lokal, Suku Obulo, Fernando Marques ba STL Domingu (30/07/2023) liu husi telefone.
Nia afirma, projetu uma 9 nee kompanhia Timor oan 3 mak kaer, kada uma ida ho montante osan US$ 17 mil, osan nee aloka deit ba konstrusaun uma nee too finaliza, tanba nee knaar autoridade lokal nian iha baze mak atu halo kontrola ba kualidade obra nee, no kompanhia Timor oan sira neebe kaer obra nee iha esperensia barak, fiar katak sei halo ho kualidade.
Nia afirma, Suku Obulo iha Aldeia 7, hanesan Mocubu, Lakoubu, Biliubu, Suriubu, Fatuk Laran, Obeto no Acubrau, maibe uma UKL nee aldeia 3 maka hetan uluk, aldeia refere maka hanesan, aldeia Obeto uma 3, Fatuk Laran uma 3 no Aldeia Mocubu uma 3, tanba nee seluk neebe seidauk hetan hein fali faze tuir mai.
(mad)
