Kuaze Ema 1000 Mak Tama Ilegal

Komandante Polisia Nasional Timor Leste (PNTL) aprezenta situasaun operasaun iha tinan 2020 nia, no atividade neebe mak PNTL halo ba iha Prezidente Republika Francisco Guterres Lú Olo. (Foto: Media PR)

DILI, STLNEWS.co – Implementa estadu emerjensia hahu husi premeiru too mai da-9, ema tama ilegal husi rai maran no tasi kuaze hamutuk 1000.

Kestaun nee hatoo husi Komandante PNTL, Komisariu Faustino da Costa ba Jornalista, bainhira remata hasoru malu ho Prezidente Republika, iha Palasiu Prezidente, Nicolau Lobato, Bairru Pite, Dili, Kinta (07/01/2021).

“Implementasaun estadu emerjensia hahu husi dahuluk too mai agora, iha 2020 deit kuaze mais 1000 pesoas, kuaze ema rihun resin neebe tama ilegal husi tasi tantu rai maran neebe kuaze ita foti ka kaptura fila fali,” hatete Komandante PNTL nee.

Nia hatutan, iha estadu emerjensia ikus nee mak iha dekretu Governu, hodi koloka artigu balun kona ba aplika koimas.

“Depois liga ba iha ita nia dekretu governu ba estadu emerjensia ikus nee maka koloka artigu ida kona-ba aplika koimas neebe kiik liu maka $30 masimu $50, maibe ida nee prosesu depois ema nee lori ona ba kuarentena depois PNTL entrega ba servisu Imigrasaun halo kontinua sira nia servisu ba implementasaun lei imigrasaun ninian,” nia esplika.

Komisariu Faustino afirma, iha 2020 instala postu foun, postu ida ba posto ida laos besik distansia kuaze 20 ital kilometrus no postu balun too 29 kilometrus katak ho distansia ida dook 29 kilometrus nee signifika iha vantajen ema tama, ho situasaun ida nee maka instala tan postu balun entre postu sira neebe iha.

Kestaun pessoal ka rekursu humanus, sei reforsa tan laos deit Unidade Patrollamentu Fronteira (UPF) maibe envolve mos Unidade Espesial Polísia (UEP), atu nunee aumenta numeru pessoal iha postu sira iha neeba, alende halo nafatin koordenasaun neebe postu balun hamutuk ho F-FDTL.

“Ita iha postu foun neebe ita instala fronteira rai maran ninian postu foun nee haat maka iha parte Maliana maibe la hatene iha neebe hanesan Maliana Villa, parte Lolotoe, Suai, Likisa mos iha ho tasi. Atu dehan ida neebe ita halo kapturasaun ikus iha semana ida nee mos ita halo kapturasaun entrada neebe mai husi parte Indonezia ninian, klaru katak iha pasadu ita hotu hatene dehan PNTL balun iha area fronteira envolve nee maka prosesu ita halo, balun neebe demisaun ona, balun ita muda sai husi fronteira ba iha munisipiu seluk.” katak nia.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here