DILI, STLNEWS.co – Relasiona ho insendiu neebe akontese iha Ministeriu Estatal, akademiku sira preokupa ho situasaun nee.
“Hau hanoin presiza seguransa sira halo investigasaun didiak ba insendiu nee, tanba ohin loron ema barak sei mosu ho duvidas,” dehan Akademiku UNTL, Romerio Maiania ba STL, Tersa nee (28/03/2023).
Nia sublinha, ba kestaun sira hanesan nee presiza tau atensaun seriu, atu halo prevensaun, nunee iha futuru labele akontese tan.
“Mosu indendiu iha edefisiu sira hanesan nee, sai mos prekupasaun ba ema hotu nian, tanba iha edefisiu balu tau mos dokumentus importante sira, tanba nee ho akontesimentu nee presiza halo kedan investigasaun, hodi hatene lo-loos, atu iha futuru labele akontese tan,” nia esplika.
Iha sorin seluk, Jurista Sergio Dias Quintas dehan, la aseita ho deklarasaun balu katak insendiu nee planeadu.
“Hau la aseita deklarasaun ida nee, tanba deklarasaun nee sai iha momentu neebe ita atu tama ba eleisaun no kampanha eleitoral,” dehan Jurista.
Nia afirma, esteitmentu neebe hasai nee la bazeia ba faktus ruma, maibe hakarak lansa informasaun hodi hamosu fali polemika no kria konfuzaun iha ita nia sosiedade.
Tuir lo-loos fo konfiansa ba iha autoridade seguransa liu-liu PNTL nebee hatun tiha ona ekipa hodi halo invstigasaun, no hein deit relatoriu husi investigasaun nee saida, mak ita bele hatene lo-loos.
Sergio dehan, insendiu nee bele akontese iha kualker fatin, tanba nee se planeadu tenki deskobre autor nee, labele soe informasaun falsu ba iha sosiedade atu halo konfuzaun sira.
(ter)
