DILI, STLNEWS.co – Setor tolu neebe konsidera importante hodi kria kampu servisu ba Timor oan sira, durante nee la lao diak, tanba nee kada tinan eskola hotu produs ema, maibe dezempregu aumenta.
“Hau hanoin atu redus numeru dezempregu iha TL, mak ita tenki fo importansia ka dezenvolve setor 3, hanesan Setor Publiku, Setor Privadu no Setor Kooperativa, tanba setor 3 nee too agora ita seidauk dezenvolve diak, tan nee implika ba numeru dezempregu iha rai laran,” kestun nee fo sai husi emprezariu Timor oan, Alberto Carvalho ba STL liu husi telefone, Sabadu nee (18/03/2023) .
Nia afirma, setor privadu bele ajuda estadu kria kampu servisu ba Timor oan sira neebe mak dezempregu, maibe setor publiku la lao ho diak, oinsa vida setor privadu nian, tanba nee atu kria kampu servisu ba joven sira, mak parte 3 nee tenki koopera malu.
Tuir nia katak, siensia sira neebe mak estudante sira nee hetan ona iha banku SMA nomos Universidade, nee reflete ba demanda merkadu, nee mak setor privadu nia hakarak, tan nee bainhira iha politika makro ida neebe diak ba dezenvolvimentu ekonomia rai laran, hatur plataforma oinsa bele absolve kampu servisu ba graduadu sira, ba setor privadu mak siensia neebe graduadu sira aprende tenki reflete ba demanda merkadu iha tempu agora nomos ba futuru.
(mad)
