Labele Halo Diskriminasaun Ba Defisiensia

Prezidente Asosiasaun Halibur Defisiensia Matan Timor Leste (AHDMTL ), husu ema hotu atu konsidera no labele halo diskriminasaun ba ema ho defisiensia, tanba tuir Konstituisaun RDTL artigu 16 ema hotu hanesan. (Foto: STL/Maria Tavares)

DILI, STLNEWS.co – Prezidente Asosiasaun Halibur Defisiensia Matan Timor Leste (AHDMTL ), husu ema hotu atu konsidera no labele halo diskriminasaun ba ema ho defisiensia, tanba tuir Konstituisaun RDTL artigu 16 ema hotu hanesan.

Diretor AHDMTL, Gaspar Afonso dehan, atividade nee tema prinsipal mak reduz diskriminasaun hasoru ema ho defisiensia iha komunidade, no mos aproveita selebra loron domin neebe monu tiha ona iha loron Domingu foin lalais, neebe ohin foin mak selebra hamutuk ho komunidade sira, neebe nia objetivu prinsipal mak hakarak reduz deskriminasaun ba ema ho defisinsia iha komunidade, tanba foin primeira vez organizasaun ida nee, realiza seminariu ida hamutuk ho komunidade sira.

“Ba hau no organizasaun ida nee nia hakarak nee, mak ema hotu tenke konsidera no valoriza dignidade ema ho defisiensia, no vuneravel sira seluk, la tempu ona atu ita halo diskriminasaun ba malu bazeia ba ita nia konstituisaun RDTL artigu 16 hatete dehan ema hotu hanesan, la hare ba ras, koor no fiziku no mental, entaun ita ida-idak fila fali ba konsiensia rasik atu labele halo diskriminiasaun ba malu tanba ami iha limitasaun iha isin lolon balu deit , maibe ami nia neon ami nia fuan hanesan ho ema hotu hotu, ami la difirente ida” dehan nia ba jornalista sira, hafoin selebra loron domin hamutuk ho komunidade sira, iha sede suku Manleuana, Segunda (15/02/2021).

Nia salienta dala barak ema sempre halo diskriminasaun nee wainhira tempu hanesan Covid nee, kuandu fahe buat ruma mak familia neebe mak ho oan defisiensia foin lori sai mai, durante nee sira sulan deit sira nia oan sira, sira la fo sai hodi partisipa ka involve iha atividades hotu iha komunidade.

Inan aman sira rasik halo eskuli ba sira nia oan rasik ho defisiensia, tanba nee mak ho eventu sira hanesan nee iha sede suku hanesan nee para komunidade no sosiedade hotu hotu ezije para lae ba diskriminasaun hasoru ema ho defisiensia sira, tanba ema ho defisiensia nee mak sai vuneravel liu ba situasaun sira hotu satan ho estadu emerjensia no mos Covid 19, tanba nee mak liu liu feto no labarik sira hasoru violasaun no diskriminasaun oin-oin, tanba nee mak konvida orador lubuk ida atu mai hato’o sira nia hanoin pensamentu, ba seminariu ida nee.

Entretantu Eis Sekretaria Estadu Formasaun Profesional no Empregu (SEFOPE), Nivio Magalhães hatete, ohin loron hetan konvite hodi sai orador iha seminariu ida nee hodi koalia kona ba partisipasaun juventude iha dezenvolvimentu neebe inklusivu, ida nee importante tebes.

“Ita hatene katak iha ita nia konstituisaun labele halo diskriminasaun ba ita nia maluk sira neebe moris ho defisiensia, tanba nee mak juventude tenke kontribui ba ida nee no juventude nafatin sai autor prinsipal hodi bele haklaken kontra diskriminasaun neebe iha, tanba nee mak ohin hau mai sei partilha informasaun sira nee.” tenik Nivio.

Reportajen: Maria Tavares
Editor: Ekipa STL

LEAVE A REPLY

Please enter your comment!
Please enter your name here