Labele Sai Atan Ba Riku Soin Mundu

Padre Rikardus Pasang SVD. (Foto: STL/Emerenciana Pinto)

DILI, STLNEWS.co – Riku soin mundu nia laos folin ba ema, maibe buat neebe mak folin mak fuan neebe mak diak no nakonu ho domin.

Kestaun nee hatoo husi Padre Rikardus Pasang SVD, liu husi refleksaun diaria Segunda, 19 Outubru 2020, Ef 2 : 1 – 10 Luk 12 : 13 – 21 katak labele sai atan ba rikusoin mundu nia.

“Labele sai atan ba rikusoin mundu nian, loron ida ohin, Jesus fo hanoin mai ita katak buat ida neebe folin boot liu iha ita moris laos uma diak iha fatin-fatin, iha kareta, iha rai barak ou iha konta bangkaria barak maibe fuan neebe diak. Nai dehan, beikten iha kalan nee kedas hau sei husu o atu saran o nia klamar, sasan sira neebe o rai hela sei sai se nian, nunee mos sei mosu ba ema neebe rai hela rikusoin ba nia-an, maibe la sai riku ba Maromak futar matan” dehan padre Rikardus Pasang SVD ba STL, via telefone, Segunda (19/10/2020).

Padre hatutan Maromak fo oportunidade no liberdade atu buka servisu hodi hetan rikusoin mundo nian atu bele sustenta moris. Maibe, labele halo ema nia moris la livre tamba rikusoin sira sa tan rikusoin sira uza ba buat aat sira neebe estraga moris.

“Ema dehan tempo agora nee osan mak manda. Iha osan barak, saida mak ita hakarak, sei realiza kedas. Osan mak manda fali ita, ita sai atan ba rikusoin sira, sai atan ba osan. Nai Maromak haraik grasa mai ita, ita simu ho haraik-an, ita maneja ho sabedoria, ita mos uza didiak ba ita moris no ba diak ita nia maluk sira, ba bonum commune (diak ba ema hotu)” katak Padre.

Amlulik nee hatutan Agradese ba Maromak neebe mak sempre akompanha ema ida idak ho grace oin oin husi Graca neebe mak iha bele fahe tutan ba maluk seluk.

“Ita agradese ba Maromak tamba Nia sempre akompanha ita ho grasa oi-oin. Se ita hetan grasa barak husi Maromak, tuir lolos ita laran luak liu tan, kontente fahe grasa ba maluk sira, neon nain atu ajuda ema seluk neebe terus no susar, ita badinas liu tan iha atividades igreja nian hodi hatudu ita nia an nuudar oan Maromak.“ tenik nia.

Nia hatutan Saun Paulo ba sarani sira iha Efeso fo hanoin katak Maromak haraik Ninia laran luak mai ema perdua salan atu ema hotu bele moris nuudar ema diak. Nee duni, halo diak ba ema maske buat kiik ida. Se buat kiik ida neebe ema halo lori ksolok ba ema, ema iha folin boot iha Nai nia futar oin amen.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here