Labele Uza Covid-19 Hapara Eleisaun PR, Tenke Tuir Kalendariu Eleitoral

DILI, STLNEWS.co – Tuir Jurista Avelino Coelho katak, labele uza Covid-19 hodi hapara eleisaun prezidensial neebe sei realiza iha tinan 2022.

Jurista Avelino Coelho, hato’o kestaun nee ba STL, liu husi telefone, Kinta nee (02/09/2021). Nia hatete, maske kada loron numeru Covid-19 aumenta, maibe labele uza Covid-19 hodi hapara eleisaun prezidensial.  

“Labele koalia eleisaun la iha, nee espekulasaun, tuir Konstituisaun Republika Demokratika Timor Leste (K-RDTL), eleisaun tenke realiza tuir kalendariu eleitoral. Labele iha hanoin atu uza situasaun Covid-19 para la realiza eleisaun. Ita bele hatudu ba mundu katak ita estadu neebe demokratiku no direitu. Hau fiar ita nia ukun nain sira sei iha sensibilidade ba ida nee. Sira sei marka eleisaun no realiza tuir kalendariu politiku eleitoral,” hatete jurista nee.

Jurista Avelino hatutan konaba kazu Covid-19 neebe mak aumenta, oras nee governu aplika ona Serka Sanitariu (SS) ou Komfinamentu Obrigatiru (KO) hodi bele kombate.

“Numeru Covid-19, hanesan ita rona, haree no publika iha media aumenta hela. Estadu aplika ona Estadu Emerjensia no governu aplika ona medidas sanitarias no regulamentares hodi kombate. Portantu, nee lao diak hela. Nunee mak hau haree katak sei la iha impaktu ba eleisaun prezidensial.” katak nia.  

Jurista Timoroan nee hatutan iha artigo 75, numeru 2 dehan mandatu Prezidente Republika nee ba tinan lima, no mandatu remata bainhira Prezidente eleitu simu pose. No iha numeru 3 artigu nee rasik dehan, mandatu so bele renova ba dala ida tan deit. No depois iha artigu 76, Konstituisaun RDTL mandatu konaba eleisaun no nia sistema eleisaun nian. Portantu, artigu nee klaru los katak mandatu Prezidente so bele renova ka hili foun liu husi eleisaun direta.

Nia hatutan se deit mak ba ukun nia mestre no juis politiku mak, eleitoradu ka povu. Neebe nuudar povu fo fiar ba mestre, mak orsida deside iha eleisaun. Partidu neebe hakarak ukun ba tempu naruk, diak liu ukun tuir nia programa eleitoral.

Nunee mos Konsellu Fundador RONETIL Laurentinho Alves hatutan, tuir Rede Observador Nasional Eleisaun Timor Leste (RONETIL) hatete, importante liu mak priense rekezitu artigu 75 Konstituisaun Republika Demokratiku Timor Leste (K-RDTL), konaba “elijibilidade”, ba kandidatura Prezidente Republika hotu, katak tenke sidadaun Timoroan, idade minimu 35, iha kapasidade diak no hetan apoiantes ka hili husi ema minimu rihun lima.

Sidadaun se deit iha direitu politiku hanesan hodi kandidata an ba PR, importante mak tuir dalan normal no hetan apoiantes ba kandidatura no iha kapasidade ukun ho diak, nomos iha analiza lei neebe rigor.*

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 26 Setembru: Kazu Pozitivu 32 & Rekuperadu 83

DILI, STLNEWS.co - Sentru Integradu Jestaun Krize (SIJK) ohin relata kazu pozitivu iha ema nain 32 no rekuperadu hamutuk 117. "Kazu detetadu foun neebe relata ohin loron...

MTKI Loke Kompetisaun Pintura

DILI, STLNEWS.co - Ministeriu Turizmu Komersiu no Industria (MTKI), liu husi Diresaun Nasional Emprendismo ba Atividade Produtus Turistiku organiza kompetisaun pintura ba joven sira. Grupu...

Remata Nia Misaun Iha TL, Sitorus Despedida Ho WNI

DILI, STLNEWS.co – Embaixador Indonezia ba Timor Leste (TL), Sahat Sitorus ho nia espoza Bintang Vera C. Sitanggang, neebe durante tinan 4 ho balun...
%d bloggers like this: