Lagoa-Estatua São João Paulo II Nia Furak Hahu Mihis

Fatin Turizmu Lagoa Tasi Tolu no Estatua São João Paulo II hahu mihis, tanba kauza husi komunidade ateru rai hodi hari Uma. (Foto: STL/Donaciano Magalhães)

DILI, STLNEWS.co – Fatin Turizmu Lagoa Tasi Tolu no Estatua São João Paulo II hahu mihis, tanba kauza husi komunidade ateru rai hodi hari Uma.

Tuir estudante Universitariu Turismu, Dili Institutu Of Technology (DIT), Liliana da Cruz, ba STL ba STL Kampus DIT Aimeti Laran, Dili, segunda (10/11/2020) semana kotuk katak, governu tenke tau atensaun seriu hodi proteze estatua São João Paulo II no Lagoa Tasi Tolu nia furak husi komunidade neebe hari uma, tanba fatin rua nee hanesan fatin turizmu no mos ikon Kapital Dili nian.

“Governu tenke hapara ona komunidade sira neebe kontinua fakar Rai hodi ateru lagoa hodi hari uma iha leten, se governu nonok hare deit, Lagoa no estatua São João Paulo II nia furak hahu mihis no manu Tasi neebe buka moris iha Lagoa laran bele mate hotu, tanba laiha fatin ba sira,” dehan Liliana.

Liliana hatutan Timor Leste iha area potensial turizmu barak neebe lokaliza iha teritoriu Timor laran, tanba nee governu presiza tau atensaun seriu hodi dezembolve fatin Turizmu sira.

Foto: STL/Donaciano Magalhães

Iha fatin seluk okupante Antonio Soares, neebe hela iha Aldeia 12 de Outobru Tasi Tolu hatete, prontu atu kopera ho governu, karik governu atu hadia Lagoa Tasi Tolu, hodi atrai turista nasional no internasional.

“Nudar sidadaun ida hau prontu kopera ho govermu Timor Leste, atu sai husi fatin nee, karik governu hakarak transforma Lagoa Tasi Tolu no Estatua Sao Joao Paulo II, sai fatin Turizmu,” dehan Antonio.

Antonio mos husu ba Governu karik atu hasai sira tenke kria uluk kondisaun neebe dignu ba sira, atu nune komunidade sira sai husi Tasi Tolu labele ba okupa fali sai estadu iha fatin seluk.

Entertantu antes nee iha tinan kotu iha dia (18/10/2020), governu liu husi Sekretáriu Estadu Terras Propriadade, sobu obrigatoriu uma 36 iha zona protezidu Lagoa Tasi Tolu.*

Reportajen: Donaciano Magalhães
Editora: Carme Ximenes

LEAVE A REPLY

Please enter your comment!
Please enter your name here