Lei La Admite Ema Ida Reprezenta Ema Seluk Iha Tribunal

Iha despaisu ikus ba prosesu primera interogatoriu, Tribunal Distrital dili aplika medida proibisaun de auzensia ba iha arguidu Liborio Pereira, maibe parte defeza halo rekursu, no ikus mai Tribunal Rekursu altera tiha medida nee. (Foto: STL/Terezinha de Deus)

DILI, STLNEWS.co – Iha kodigu prosesu kriminal hatete ona katak, keisa neebe hatoo husi parte ida, atu kontra ema ruma, ema sira nee rasik maka sei ba hatan iha Ministeriu Publiku ka Tribunal, labele reprezenta fali husi ema seluk, tanba lei la admite.

Tuir Jurista Sergio Dias Quintas katak, kuandu ema ruma hatoo keixa kriminal ba iha ministeriu publiku hasoru ema ida hanesan arguidu, se Ministeriu Publiku hare katak ema sira nee presija presta nia deklarasaun perante ministeriu publiku, ema sira nee labele reprezenta husi ema seluk, ema nain rasik mak ba hatan iha ministeriu publiku.

“Ita nia kodigu penal iha artigu 12 kona ba responsabilidade kriminal, iha numeru ida hateten katak, responsabilidade kriminal tanba infrasaun sira neebe, hakerek hela iha kodigu ida nee monu deit ba pessoal singular sira, no labele transmite ba ema seluk,” dehan Sergio ba STL iha TDD, Segunda (25/01/2021).

Nia hatutan, responsabilidade kriminal ba ema ida labele transmite ba ema seluk, nia rasik mak ba hatan iha ministeriu publiku tantu iha tribunal, tanba preve ona iha kodigu penal.

Bainhira ema ruma hatama keisa ba iha Ministeriu Publiku indika ema ruma iha indisus krime ruma nia rasik mak ba hatan iha autoridade judisiariu, iha Ministeriu Publiku no Tribunal no labele indika fali nia reprezentante nee kodigu penal la admite, bele akontese iha prosesu sivil halo prokurasaun.

Jurista nee dehan, iha prosesu sivil menores insertu ema seluk bele reprezenta, maibe tenke iha prokurasaun, tanba Ministeriu Publiku tuir kodigu prosesu sivil bele atua em nome ba monoridade, sira bele reprezenta minoridade ka estadu, tanba iha kodigu sivil fo dalan.

Nunee iha prosesu kriminal la admite ema ruma soe fali nia responsabilidade kriminal ba ema seluk, no nia rasik mak diretamente ba hatan iha autores judisiariu iha ministeriu publiku no tribunal.

Hatan kona ba nia interpretasaun Xanana Gusmao reprezenta CPN-CNRT hodi sai arguidu ba hatan iha Tribunal, relasiona ho Mari Alkatiri nia keisa ba iha Ministeriu Publiku, nia esplika, se keisa krime nee hasoru individu sira rasik mak ba hatan, labele reprezenta.

“Se Mari Alkatiri halo keisa ba iha Ministeriu Publiku tenke hare lai nia keisa kriminal nee hasoru se, se karik hasoru individu iha partdiu CNRT nia laran, individu sira nee mak ba hatan diretamente iha Ministeriu Publiku, labele sira nia responsabilidade nee transmite fali ba sira nia lideransa partidu politiku, lei la admite tuir artigu 12 husi KP,” dehan nia.

Reportajen: Terezinha de Deus
Editora: Carme Ximenes

LEAVE A REPLY

Please enter your comment!
Please enter your name here