Lei Reforma Obrigatoriu, Governu Seidauk Haruka Inisiativa Ba PN

DILI, STLNEWS.co – Lei Reforma Obrigatoriu, governu seidauk haruka inisativa mai Parlamentu Nasional (PN), tanba to’o agora Komisaun A ne’ebe trata asuntu Konstitusionais no Justisa, to’o agora seidauk iha informasaun.

Kestaun nee hato’o husi Prezidente Komisaun A trata asuntu Konstituisional no Justisa husi Bankada CNRT, Deputadu Patrocino Fernandes.

“Kona ba Lei Reforma Obrigatoriu, agora dadaun Komisaun A laiha informasaun, maske iha Kinta Lejislatura VIII Governu husu tiha ona autorizasaun ba PN fo utiliza ba sira halo lei kona ba reforma obrigatoriu, maibe liu tiha tempu neebe mak parlamentu fo ba sira la konsege halo, entaun to’o agora seidauk haruka fali inisiativa ruma mai PN,” dehan nia ba jornalista sira iha PN, Sesta (02/02/2024).

Deputadu Patrocino esplika, Lei Reforma Obrigatoriu nia inisiativa tenke mai husi Governu, tanba nee kompetensia PN, entaun inisiativa tenke mai husi governu tanba governu mak kaer responsavel kona ba politika jestaun estadu no politika jestaun ba funsionalismu publiku, nune’e inisiativa tenke mai husi governu tanba sira mak hatene no halo analiza kona ba nesesidade estadu nian ba funsionamentu makina estadu nee oinsa.

Nia tenik tuir governu nia analiza, Timor oan sira too idade hira mak konsidera sei produtivu, entaun buat sira nee presiza halo analiza didiak depois mak halo lei ida kona ba reforma obrigatoriu ne’e.

Nia afirma, nune’e lei ne’e haruka mai bele serve duni no parte ida atu proteje ema nia diretu, parte seluk mos asegura funsionamentu makina estafu ne’e atu lao diak liu tan iha efisiensia i efikasia nia laran, tanba ne’e presiza inisativa ne’e mai husi governu.

“Ne’ebe emprinsipiu Komisaun Funsaun Publika iha diskusaun OJE 2024 nian, Komisaun A alerta hela situasaun ne’e hodi KFP atu tau iha konsiderasaun, maibe liu-liu Ministru do Prezidensia Konselhu Ministru nian mos atu tau iha konsiderasaun para haree ida ne’e

“Ami iha komisaun hein hela se inisiativa ne’e mak governu haruka ona mai, konserteza Komisaun A sei tau ida ne’e nudar ajenda prioridade, maibe de faktu ita haree katak presiza duni iha Lei Reforma Obrigatoriu para bele regula diak liu ita nia forsa traballu estadu nian iha hanesan funsionariu publiku sira,” hakotu nia.

(dom)

LEAVE A REPLY

Please enter your comment!
Please enter your name here