Lei Violensia Kontra Feto Aprova

Ministru Prezidensia Konselu Ministru (MPKM), Fidelis Leite Magalhães. (Foto: MPKM)

DILI, STLNEWS.co — Konsellu ministru aprova ona projetu deliberasaun neebe aprezenta husi Sekretaria Estadu ba Igualdade no Inkluzaun, konaba bandu halo violensia hasoru feto iha espasu publiku.

Tuir Ministru Prezidensia Konselu Ministru (MPKM), Fidelis Leite Magalhães katak konsellu ministru aprova ona projetu dliberasaun neebe aprezenta husi Sekretaria Estadu ba Igualdade no Inkluzaun, Maria Jose Fonseca Monteiro de Jesus.

Nia informa projetu lei nee atu kontribui ba prevensaun violensia bazeia iha jeneru no disponibilidade rekursu neebe sufisiente destina ba implementasaun no monitorizasaun lejizlasaun no politika sira kona ba violensia bazeia iha jeneru iha espasu publiku sira.

“Ho espesial atensaun ba feto sira iha situasaun vulnerabilidade boot neebe konsidera ninia kondisaun fízika no mental, sira neebe hela iha area neebe risku boot ba dezastre natural,” dehan MPKM Fidelis Leite Magalhaes hafoin remata enkontru konsellu ministru iha Palasiu Governu, Dili, Kuarta (21/10/2020).

Nunee projetu nee iha durasaun fulan 48 no orsamentu total dolar amerikanu hamutuk millaun 7,7, sei implementa husi UN Women Timor Leste, iha koordenasaun ho Sekretaria Estadu ba Igualdade Jeneru no Inkluzaun, iha parseria ho ajensia nasaun unidas sira seluk no iha kooperasaun ho Minesteriu no Instituisaun publiku sira seluk neebe relevante, nunee mos organizasaun sosiedade sivil.

Projetu nee, integra iha ambitu Planu Asaun Nasional nian kona ba violensia bazeia ba jeneru, ho potensial atu hametin implementasaun planu multisetoral sira neebe dezenvolve no lidera husi Governu.*

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here