Lelaun Kareta, Konsidera Deputadu Matan Laiha Sentidu

DILI, STLNEWS.co – Sosiedade Sivil konsidera deputadu sira desidi atu halo lelaun ba kareta neebe deputadu sira uza iha terseiru lejislatura, ida nee la hatudu sentidu responsabilidade ba estadu.

Kestaun nee hatoo husi Diretor AJAR, Jose Luis Oliveira ba STL iha nia knaar fatin Farol, Kuarta (31/05/2023).

Nia hatete, ida nee Parlamentu Nasional laiha sentidu nasionalidade no responsabilidade ukun, hodi aproveita deit ba aan.

“Ida nee hatudu momos ita nia deputadu no lider orgaun soberanu sira liu-liu Parlamentu Nasional laiha sentidu responsabilidade ba estadu nee, ita nia estadu nee seidauk iha kondisaun ekonomia neebe estavel ka ekonomia neebe la ho rendimentu neebe aas, tuir lo-loos ita prioritiza uluk intrese publiku, intrese atu hametin funsionamentu orgaun estadu nee ho didiak, se desidi lelaun kareta estadu neebe iha deputadu sira nia liman, signifika sira matan delek atu haree nesesidade neebe prioridade ba estadu nee,” dehan nia.

Nia hatutan, kareta lelaun diak liu entrega ba iha patrimonia estadu, nunee sira aloka ba iha ministeriu neebe mak presiza, tanba polisia mos presiza kareta hodi halo patrulhamentu inklui mos parte saude mos presiza.

“Fasilidade neebe mak atu servi povu iha terenu menus, too agora aviaun deit mos laiha ita nia forsa defeza, polisia seidauk iha aviaun tanba seidauk iha nesesidade atu sosa, agora atu sosa roo deit depende ba Australia, Japaun, ita esmola fali ba ema, serake ita lakohi, invez osan nee ita poupa hodi sosa fasilidade sira neebe mak prioridade ba funsionamentu estadu nee, duke gasta osan ba sira neebe la servisu ona, sira nee reformadu ona la produs ona, tanba sa estadu sustenta tan sira,” katak nia.

Diretor AJAR nee dehan, agora mos sei prioridade barak oinsa atu hametin kapasidade atu bele kompete ho pais seluk, agora tama ona ASEAN, maibe Polisia Nasional Timor Leste sei presiza transporte, F-FDTL mos presiza, kareta ambulansia sira tula moras mos la sufisente, ida nee presiza tau atensaun, tanba nee lo-loos patrimoniu estadu sira nee aloka ba sira hodi halo servisu.

“Agora deputadu sira mandatu atu remata, hakarak atu lori hotu kareta ho lelaun, nee hanesan matebian Sisto koalia kanten nee mak nee, hanoin deit nia aan nee hanesan nee, depois sakrifika estadu tau preziozu ba estadu, ida nee tuir hau nia hanoin nee korupsaun politiku,” katak nia.

Nia hatutan, parlamentu mos laos klase elit ida neebe hamriik iha estadu nia leten, se nudar estadu direitu demokratiku mak tuir lo-loos kareta estadu nee sosa osan povu nia submete ba rejime ida nee katak, tenki entrega ba iha patrimonia estadu atu halo prosesu alinamentu lelaun.

Nunee mos Diretor HAK, Feliciano Da Costa Araujo hatutan, buat neebe mak membru governu uza nee tama ba acet estadu ou patrimoniu estadu nia.

“Hau la hatene sira nia justifikasaun nee tanba sa mak sira tenki lelaun, buat sira nee mos hanesan la ses husi pensaun vitalisia, pensaun vitalisia tanba ema interpreta tuir nia hakarak, sira seluk mai hatete imi goza ona, entau ami mos goza hanesan nee, ba iha kampanha temi liafuan ida nee mai iha implementasaun ami la hasai,” nia afirma.

Nia hatete, tuir sosiedade sivil nia haree mak ida nee, se kuandu deputadu sira halo lelaun ona kareta neebe mak durante nee sira uza, depois deputadu sira tuir mai mos halo tuir lelaun nafatin kareta neebe mak sira uza, ho razaun kareta tuan ona, ida nee signifika ba tuur iha neeba intrese deit ba estadu nia sasan.

(eme)

LEAVE A REPLY

Please enter your comment!
Please enter your name here