Lere: Funu Gerileiru Konsidera Xanana Naan Dois

Xefe Estadu Maior Jeneral F-FDTL, Major Jeneral Lere Anan Timur. (Foto: STL/Emerenciana Pinto)

DILI, STLNEWS.co – Xefe Estadu Maior Jeneral, Major Jenereal Lere Anan Timur hatete, lider karismatiku Xanana Gusmao nuudar maun boot ba sira, tanba iha tempu funu Gerileiru sira konsidera Xanana nuudar naan dois.

Dehan Jeneral Fitun Rua nee ba jornalista sira, bainhira remata enkontru ho Prezidente Republika, iha Palasiu Prezidente Nicolau Lobato, Dili, Kuarta ( 27/01/2021).

“Xanana Gusmão ami nia aman no ami nia maun, uluk iha ai laran gerileiru sira konsidera naan dois ema lakoi halo seguransa ba nia tanba tauk, tauk saida laos tauk inimigu, tauk keta Xanana mate iha sira nia leet, kuandu Xanana dezaste mate iha ami nia leet, entaun ami sira atus ida, atus rua lao hamutuk nee tenke mate hamutuk ema ida labele halai, ordem neebe ami fo mak nee Xanana mate ikus, tanba ami nia lider atu bele kondus lori funu nasaun nee ba oin too manan funu,” hatete nia.

Nia dehan, ema neebe aproveita maun Xanana kuidadu, maun Xanana diak nafatin hanesan nee sira hakmatek. Xanana hetan diak basa liman, maibe kuandu Xanana monu ba sala ruma ka saida ruma, sira neebe haleu tenke kuidadu.

“Ami laos F-FDTL maibe ami FALINTIL mak sei husu responsablidade, ba ema sira neebe besik nia, tanba saida mak ami nia Komandante moras hanesan nee,” nia hatete.

Lere hatutan, konaba deklarasaun husi CPN-CNRT neebe hatete, Xanana mak ba hatan iha Tribunal nia dehan, Alkatiri laos keisa Xanana.

“Agora CPN CNRT dehan Maun Xanana mak ba, nee maun Mari hatete dehan, hau la keisa Maun Xanana, maibe hau keisa sira seluk nee, nusa mak Maun Xanana mak ba fali, nee politika sira mak hatene, mais ami solidarida nafatin ho ami nia Maun Xanana ami lasoe, ami la soe,” katak Jeneral Lere.*

Reportajen: Emerenciana Pinto/ Est.To
Editora: Carme Ximenes

LEAVE A REPLY

Please enter your comment!
Please enter your name here