Lere Husu PNTL Foti Medidas Seriu Ba Kriminozu

DILI, STLNEWS.co – Komandante das Falintil FDTL, Tenente Jeneral Lere Anan Timur husu Polisia Nasional Timor Leste (PNTL), atu toma medidas seriu ba kriminozu sira neebe mak kalan asaltu malu no hana ema iha tempu kalan.

Kestaun nee Jeneral Lere Anan Timur hatoo ba jornalista sira bainhira remata ho Prezidente Republika Francisco Guterres Lú Olo iha Palasiu Prezidente Bairru Pite, Kuarta (24/03/2021).

Komandante F-FDTL nee hatutan, hasoru malu nee ho objetivu mak atu informa situasaun konaba seguransa defeza no hanesan mos situasaun forsa armadas nia servisu no situasaun ikus mak ameasadu oituan iha Dili.

“Segundu konaba situasaun rai laran, hanoin katak imi jornalista sira neebe akompania situasaun ikus loron rua, loron tolu mai nee, liu liu ba arte marsiais. Hau haree iha Facebook, Whatsapp, haree nee ita Timor ho Timor mak halo malu nee immoral. Hau hanoin kestaun atu rezolve problema ida nee polisia nasional mak toma medidas seriu ba ema kriminozu sira nee, tanba kleur ona ita la rona ona arte marseais, agora ikus mai ita rona fila fali,” hatete nia.

Tenente Jeneral nee hatutan, Timor atu oho malu tempu liu ona no baku malu tempu liu ona agora nee ema hotu nia preokupasaun mak ba Covid-19 nee, halo oinsa para labele daet. Dala barak ema dehan corona nee laiha, maibe corona nee hanesan inimigu boot ida.

Hanesan nasaun vizinu Indonezia sidadaun barak mate, tantu Atambua no Kupang nee besik liu Timor Leste, hanesan mos Australia, Amerika, nasaun sira nee mos ema mate ba Covid19.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here