Liafuan Entrevista Ikus Husi Jornalista, Amandio Promete Buat Lubuk Ida

DILI, STLNEWS.co – Ministru Justisa Amandio De Sa Benevides, durante nee kolabora diak tebes ho jornalista sira, maski iha situasaun dezentendimentu ruma.

Bainhira kaderneta pasaporte seidauk too mai iha Timor, jornalista barak mak buka tuir Amandio atu halo konfirmasaun, maibe situasaun balu Amandio lao ses husi jornalista sira, tanba kaderneta pasaporte seidauk too.

Mosu kritika iha media sosial facebook, mosu kritika sosiedade sira nian iha media eletronika, no media imprime sira konaba situasaun kaderneta pasaporte, maibe resposta neebe nia hatoo mak pasiensia hein sei buka solusaun.

La nonok deit, Amandio esforsu makaas kaderneta pasaporte 16 mil too uluk mai, momentu neeba Amandio dehan, nesesidade utiliza pasaporte makaas liu, tanba nee kaderneta pasaporte 16 mil tenki hotu. Amandio esforsu nafatin, hodi faze segundu kaderneta pasaporte 20 ital too tan mai.

Bainhira pasaporte 16 mil tama primeiru mai, ema barak mak kestiona konaba servisu atendimentu notariadu nian, tanba ema barak mak hadau malu. Ho nunee esforsu Amandio nian, iha planu foti desizaun hodi halo atendimentu ajendamentu online, neebe foin lalais lansa iha loron (18/01/2024).

Remata husi lansamentu nee, iha entrevista ikus husi jornalista sira ba Amandio promete buat lubuk ida.

Konaba pasaporte, Amandio dehan, lakohi akontese tan hanesan situasaun sira neebe akontese ona, ba futuru mak nia parte dehan, “hau sei buka hela mekanizmu oinsa atu halo fali akizasaun ho numeru neebe boot, hau sei prepara akizasaun ida atu Primeiru Ministru no Konselhu Ministru aprova atu halo akizasaun foun, hodi labele akontese fali hanesan situasaun hirak neebe liu ba nee,” dehan Amandio iha entrevista ikus ba jornalista sira.

Amandio mos promete sei rezolve problema konaba blanko laiha, no sei haree mos sentru formasaun ketak ba dadur juvenil sira, tanba maski sira halo sala maibe tau mos sira iha kondisaun neebe diak.

Nia promete mos sei tau atensaun ba estatutu guarda prizional sira, tanba barak servisu kleur ona maibe seidauk iha estatutu ida hodi haree ba sira nia servisu. Sei haree mos lei advogadu privadu, no sei haree mos ba lei liberdade relijiaun, tanba simu ona pareser sira nee husi amu bispu nain tolu.

Promete neebe ministru nee halo sai deit hanesan lembransa ida, no esforsu neebe halo ba iha kaderneta pasaporte too ona mai Timor, halo duni lansamentu online, seidauk tama iha implementasaun konaba sistema online nee, Amandio hakotu iis iha loron 20/01/2024.

Ema neebe laran diak, sempre atende jornalista sira kuandu iha tempu livre, tanba konsidera jornalista nia papel importante atu fahe informasaun ba rona nain sira.

(ter)

LEAVE A REPLY

Please enter your comment!
Please enter your name here