DILI, STLNEWS.co – Ministeriu Finansas (MF) simu hikas ona lista jornalista lina frente, husi Ministeriu Asuntu Parlamentar no Komunikasaun Sosial (MAPKOMS), no oras nee sei halao hela prosesu verifikasaun.
Informasaun nee hatoo husi Ministru Finansas, Rui Gomes ba jornalista sira, Tersa nee (03/05/2022) iha Parlamentu Nasional (PN), wainhira ba halo audensia ho deputadu sira konaba proposta orsamentu retifikativu.
“Konaba lista jornalista ba lina frente, ami foin simu iha semana kotuk, no oras nee daudaun sei iha prosesu verifikasaun,” informa Ministru Finansas Rui Gomes.
Nia dehan, iha prosesu verifikasaun nee sei halao hela, tanba lista barak, neebe haree took ba akompanha despaisu sira neebe mak iha, depois de prosesu verifikasaun hotu, sira sei prosesa kedas.
Iha fatin hanesan, deputadu husi Bankada PD, Mariano Assanami Sabino hatete, relasiona ho situasaun difisil neebe mak Covid-19 atake Timor-Leste, ema sira nebe mak hamriik iha oin mak hanesan pesoal saude, Polisia, jornalista sira no seluk, tanba hodi luta ba kombate situasaun ida nee. Tanba nee husu governu atu halo pagamentu ba pesoal sira nebe mak halao servisu iha lina frente, liu-liu mos ba jornalista sira atu labele halo diskriminasaun ba pesoal lina frente sira.
Tuir informasaun neebe mak STL asesu, oras nee daudaun lista jornalista sira nian Ministru Asuntu Parlamentar no Komunikasaun Sosial (MAPKOMS) sub-mete ona iha fulan hira liu ba, maibe tanba iha failhansu tekniku balu, tanba nee MF haruka fila mai MAPKOMS, no iha semana kotuk nee, MAPKOMS sub-mete hikas fali ba iha MF, no oras nee daudaun sei iha prosesu verifikasaun husi MF.
Entretantu, tuir observasaun STL haree katak, prosesu ba pagamentu direitu lina frente nee parte pesoal saude, seguransa no parte seluk tan, barak hetan ona pagamentu, maibe pesoal sira neebe mak halao profisaun nudar jornalista hodi halao kobertura ba iha informasaun Covid-19 too oras nee seidauk hetan pagamentu.
(gui)
