DILI, STLNEWS.co – Prezidente Autoridade Nasional Komunikasaun (ANC), João Olívio Freitas hatete, populasaun neebé lamenta ho linha komunikasaun husi operador telekomunikasaun balu, bele hatoo reklamasaun.
“Ita disemina informasaun sira nee ba publiku, liu-liu iha Munisipiu Manufahi, Lautem no Munisípiu Ermera, buat neebe ita hakarak atinji mak nee, populasaun atu trata ninia deklarasaun bainhira servisu neebe mak nia adere ba, la fornese ho kualidade neebe mak konsumidor nee hatoo ba bainhira sosa servisu refere,” dehan Prezidente Autoridade Nasional Komunikasaun (ANC), João Olívio Freitas, iha Salaun City 8 Manleuana, Dili, Sesta nee (22/07/2022).
Tanba nee, Prezidente ACN nee husu ba para konsumidor halo reklamasaun hasoru operador, atu nunee loke dalan ba autoridade bele tama ho lei neebe mak vigora ona, prosesu sira nee tenki mai husi konsumidor, tanba hatene liu servisu saida mak asesu ba.
Nia konta, ANC estabelese ona Gabinete Protesaun konsumidor iha tinan 2021, maibe seidauk iha konsumidor ruma neebe halo reklamasaun ba servisu operador. Maibe iha duni reklamasaun balu neebe hatoo husi Asosiasaun Tane Konsumidor, halo keixa iha reklamasaun haat no ikus mai rezolve hotu.
Entretantu, operador telekomunikasaun sira neebe daudaun nee halao servisu iha Timor Leste hamutuk tolu, Timor Telekom, Telkomsel no Telemor.
(alb)
