DILI, STLNEWS.co – Koordenador Movimentu Progresista Timor Leste, Rogerio da Cruz hatete hatete, nia konkorda ho deklarasaun Prezidente Partidu CNRT Kay Rala Xanana nian, konaba bainhira CNRT manan iha eleisaun parlamentar 2023, nia desidi atu loke auditoria ba fundu programa sesta bazika.
“Hau konkorda ho idea Prezidente Partidu CNRT Kay Rala Xanana Gusmão, presiza halo auditoria ba iha implementasaun programa sesta bazika nee, osan nee povu nia osan, governu uza hodi implementa programa sesta bazika, maibe iha nia implementasaun la tuir nia dalan,” hatete Rogerio da Cruz ba STL iha nia knaar fatin Mas Lidu, Tasi Tolu, Domingo (16/4/2023).
Nia katak, antes mosu lamentasaun husi komunidade sira konaba sesta bazika neebe distribui hodi ajuda komunidade sira, maibe iha komunidade balu simu sasan sesta bazika mak la too ba montante US$ 50.
“Komunidade preokupa, tanba produtu sesta bazika neebe kompanhia sira fahe, ninia presu ka montante nee la too US$ 50, haree ba iha distribuisaun sasan sesta bazika, komunidade sira konta tuir presu osan ba sasan nee la too osan neebe mak iha,” Rogerio afirma.
Antes nee iha Kinta lorokraik (13/04/2023), bainhira halao konsolidasaun Partidu CNRT iha Kuluhun de Baixo, Prezidente Partidu CRNT Kay Rala Xanana Gusmão hatoo deklarasaun nee, bainhira CNRT manan iha eleisaun 2023 sei halo auditoria ba programa sesta bazika.
(cri)
