Loron 13 Outubru Sarani Arkedioseze Dili Halao Prosesaun Husi Motael Too Lesidere

DILI, STLNEWS.co – Loron 13 Outubru 2023 hanoin hikas aparisaun Nain Feto do Rosario de Fatima ba bibi atan nain 3, iha Fatima Portugal, sarani Arkedioseze Dili halao prosesaun husi Igreja Santo Antonio Motael too iha Monumentu Nain Feto Lesidere.

“Nai Feto sai inspirasaun ba ema Katolika, tanba nia fiar metin tebes iha Maromak, ita sempre konsidera Virjen Santa Maria hanesan inan neebe lori ita nia harohan sira, tanba Virjen Maria mak simbolu forti ba Kristu,” hatete Amu Paroku Motael, Padre Guilhermino da Silva iha nia omilia, iha Monumentu Nain Feto Lesidere, Sesta loraik (13/10/2023).

Padre Guilhermino hatete, Nai Feto haraik aan obedese ba Maromak nia domin, nia simu knaar hanesan Kristu nia inan, iha fiar tomak husi nia vokasaun.

“Nain Feto Maria Virjen iha papel importante iha Jesus Kristu nia moris, tau matan no eduka Jesus durante Nia sei kiik, Nain Feto kontinua Kristu nia misaun durante tinan 3 too mate iha Kruz, iha momentu neeba dramatika tebes, Nia hamriik iha Kruz hodi hateke nia Oan neebe terus tebes-tebes,” amu esplika.

Prosesaun hahu tuku 15.30, primeiru Kruz boot uluk, akolitus, padre, madre, semininarista, estudante, grupu katergoriais no sarani sira, tuir dalan reza kanta hodi akompanha ilas Nain Feto too iha Lesidere.

Partisipa iha prosesaun nee husi reprezentante Santa Se iha Timor-Leste (TL), Monsignor Marco Sprizzi, akampanha husi Vigariu Jeral Arkedioseze Dili, Padre Graciano Santos Barros nomos amululik sira seluk husi Arkedioseze Dili nian.

(joa)

LEAVE A REPLY

Please enter your comment!
Please enter your name here