DILI, STLNEWS.co – 30 de Agosto 1999 nudar loron konsulta popular, loron neebe importante tebes hodi determina povu Timor-Leste nia destinu husi invazaun Indonesia liu husi eleisaun, hodi hetan ukun rasik aan.
Lia hirak nee hatoo husi Amu Paroku Santo Antonio Motael, Padre Guilhermino da Silva ba STL iha Motael, Segunda nee (28/08/2023).
“Konsulta popular nee iha nia sentidu neebe boot. Ba hau pesoas hanesan Timor oan, enjeral ba povu Timor-Leste, tanba konsulta popular nee hanesan loron neebe determina tebes povu TL nia destinu hanesan povu neebe bele moris iha liberdade iha nia rai rasik,” hatete Padre Guilhermino.
Padre nee relata, iha tempu malae mutin nian, nia ladun hatene, tanba moris iha presaun okupasaun militar Indonezia nia ukun laos buat neebe fasil, tanba senti no koko oinsa terus iha momentu okupasaun nian nee.
“Tanba nee, ba hau loron konsulta popular nee iha los sentidu boot ba hau hanesan povu TL, tanba nee hau orgulhu ba desizaun ONU nian, hodi fo loron eleisaun ida nee determina povu TL nia destinu,” hatete Padre Guilhermino.
Nia informa, Timor oan hotu tenki valoriza loron konsulta popular nee, laos atu selebra iha festeza deit, maibe valoriza oinsa bele ense tempu ukun rasik aan nee ho dezenvolve ba rai nee ba futuru neebe diak liu, ba povu Timor nia moris prospero ba rai ida nee, tanba nee ema hotu kontribui ho atitude pozitivu badinas servisu nomos respeitu ba iha estrutura no lei sira nee, i buat neebe la diak atu buka hadia.
(joa)
