DILI, STLNEWS.co – Deputadu Bankada PD Ernesto Dudu hatete, relasiona ho ohin loron 4 fulan Setembru hanesan loron espesial ba Timoroan hotu, tanba tinan 24 kuandu funu la hatene atu manan funu nee bainhira, maibe ho loron ida ohin nee mak povu nee sente katak, manan duni ona funu nee.
“Loron ida ohin hanesan loron espesial ba povu Timoroan hotu, tanba uluk iha tinan 24 kuandu funu la hatene katak, manan funu nee bainhira, nee povu la sente. Maibe ohin loron mak povu nee sente katak, manan duni ona funu nee i sai husi nakukun no manan duni naroman ona,” dehan Deputadu Dudu ba STL liu husi telefone, Sabadu nee (04/09/2021).
Nia dehan, ho loron espesial nee, husu ba jerasaun foun sira, agora ema hotu – hotu iha radiu no televisaun no buat barak, povu mak akompana hahalok ukun nain sira halo nee. Tanba jerasaun tuan lori tiha ona mai ukun an no ohin loron povu Timor manan tiha ukun an nee, maibe agora tanba dada malu ho hahalok koruptor la halo povu lao ba oin, maibe halo povu fila fali ba kotuk.
Nia tenik, tanba nee povu ohin loron labele hatete dehan partidu ida mak diak liu fali nee lae, maibe povu mak akompana no haree saida mak nai ulun sira halo.
Nia akresenta, buat hotu – hotu lao nee loos hela, maibe taka fali povu no oho fali povu mak perigu la halimar, tuir lolos povu tenke lao ba oin, maibe fila fali ba kotuk.
“Nusa iha buat ruma karik la dehan loos deit katak, povu nia dalan mak nee, no governu nia dalan mak nee, ita taka buat hotu ba povu hanesan ita mak kaer tudik ida ita oho povu, tanba nee povu nia sentimentu mak ida nee,” nia afirma.
Nia afirma, se konsiensia loron ida ohin inves povu kontete no lao ba oin, maibe lae povu fila fali ba kotuk.*
Reportajen: Domingas Soares
Editor: Ekipa STL
