DILI, STLNEWS.co – Sosiedade Sivil (SS) husu IX Governu iha fulan 3 nia laran aprezenta lista Komisariu Komisaun Anti Korupsaun (KAK) ba iha Parlamentu Nasional (PN) halo diskusaun, tanba instituisaun nee importante.
Kestaun nee hatoo husi Diretor Ezekutivu Forum Organizasaun Naun Governamental Timor Leste (FONGTIL), Valentim da Costa Pinto ba jornalista iha Salaun Hak Farol, Kinta (13/07/2023).
Nia hatete, Komisariu KAK nee instituisaun neebe importante tebes, hodi promove boa governasaun.
Diretor dehan, Komisariu KAK antes nee governu anterior aprezenta ona lista, maibe deputadu sira husi parlamentu la konsege konkorda malu hodi hili Komisariu KAK. Iha tempu neeba FONGTIL mos koalia buat barak hodi rekomenda katak, bloku oposizaun no governu tenki konkorda malu, tanba institusaun ida nee luta ba vizaun estadu nia hodi promove boa governasaun diak.
Diretor nee afirma, instituisaun KAK atu garante boa governasaun no garante direitu no promove efisiensia no efikasia iha servisu publiku, liu liu konaba pratika no prevene pratika korupsaun sira iha instituisaun publiku sira. Antes komisariu anterior mandatu remata, lo-loos iha tempu neeba kedas iha ona subtituisaun, maibe realidade too mai agora, too fulan balun nia laran ona, maibe ita laiha Komisariu KAK foun.
Nia afirma, iha loron balun ba kotuk iha movimentu konaba veikulu governu neebe kontinua lao iha loron Sabadu, Domingu, neebe lao ladun iha responsabilidade, entau presiza prezensa KAK nia hodi tau matan, nee importante los.
Nunee mos Diretor Ezekutivu Hak, Feliciano da Costa hatete, bainhira aprezenta naran atu hili Komisariu KAK foun, governu bele propoin hodi lori ba parlamentu hodi bele diskuti.
“Kestaun tanba saida ate agora laiha, hau hanoin iha VIII Governu deputadu sira seidauk iha konsensus, signifika atu desidi Komisariu KAK tenki atinji 2/2 dois tersus, signifika husu 65 kadeira nee tenki atinji ba 43 iha tempu neeba partidu FRETILIN propoin inklui PLP, PD, maibe sira la prienxe, tanba CNRT la fo apoiu,” katak nia.
Nia hatutan, ba oin partidu politiku neebe konsentra iha PN neebe hetan fiar husi povu, sai reprezenta povu tau ona konsiderasaun ba ida nee, signifika oinsa diskuti hamutuk bele tau prioridade ida nee.
Nunee mos Diretor Ezekutivu Ajar Jose Oliveira hatete, atu hili Komisariu Kak presiza iha konsensus nasional entre Partidu Oposizaun nomos Partidu Governu.
Nunee mos iha V lejislatura iha Parlamentu Nasionál (PN), la konsege halo eleisaun ba Komisariu foun Komisaun Anti Korrupasaun Kak, tanba Bankada CNRT la marka prezensa iha plenaria hodi priense kourum 43 Deputadu hodi bele halo eleisaun ba Komisariu foun KAK.
(eme)
