DILI, STLNEWS.co – Komemora loron Konsulta Popular ba dala 24, atividade komersial iha kapital Dili, liu-liu atividade negosiu hanesan loja no kios sira balun taka, maibe iha balun kontinua faan sira nia sasan.
Tuir trabalhador Maria da Costa katak, maski loron boot, maibe atividade negosiu kontinua lao, tanba Xineza sira nee mai buka osan, sira la hatene loron feriadu.
“Hanesan trabalhador ami tenki kumpri desizaun husi ami nia patraun, sira dehan feriadu taun ami feriadu, maibe sira dehan servisu, mak ami servisu, tan nee loron ohin ami la feriadu,” dehan trabalhador hein loja nee ba jornalista iha Tasi Tolu, Kuarta (30/08/2023).
Nia afirma, loron boot loja balun taka, hodi fo tempu ba trabalhador sira pasa tempu ho sira nia familia, maibe loja balun kontinua loke, ate loron Domingu mos la feriadu, no gaji aumenta, servisu iha loron feriadu sira selu ketak US$ 5, hanesan loron ohin la feriadu, maibe loraik sira selu ketak US$ 5 ba kada trabalhador neebe servisu ohin nian.
Iha parte seluk, tuir observasaun STL nian iha trenu haree katak, loja Xineza nian nomos Timor oan sira nian, hahu husi Tasi Tasi too iha Kolmera, loja balun loke no balun taka, sira neebe loke maioria loja Xineza nian, aleinde atividade komersial, transporte publiku sira mos halao operasaun hanesan baibain, maibe pasajeiru ladun barak.
(mad)
