Lú Olo: 20 Agostu Hanoin Hikas FALINTIL Nia Luta; FALINTIL Ikan, Povu Be’e

Prezidente Republika Francisco Guterres Lú Olo husu membru Frente Armada, ne'ebé mak hola parte iha luta no veteranus sai mata dalan no apoiu malu iha situasaun pandemia Covid19. (Photo: STL News/Donaciano Magalhãe)

DILI, STLNEWS.co – Prezidente Republika (PR) Francisco Guterres Lú Olo hatete, loron 20 de Agostu selebra loron FALINTIL ba dala 45, hodi hanoin hikas mehi no valor ne’ebé Asuwain Falintil husik hela.

Prezidente Republika Francisco Guterres Lú Olo hato’o kestaun ne’e, liu husi diskursu bainhira partisipa komemorasaun loron 20 de Agostu, iha Kuartel Jeral Fatuhada, Kinta (20/08/2020).

“Ho ksolok tebes ohin hau mai hamutuk ho maluk sira iha fatin ida ne’e atu selebra loron Aniversariu FALINTIL ba-dala haat nulu resin lima (45). Loron ida ohin mos fo-hanoin hikas mai ita sira ne’ebé sei moris atu kontinua hatutan mehi no valor sira ne’ebé Asuwain FALINTIL sira husik hela mai ita.” hatete PR Lú Olo.

PR Lú Olo dehan tema selebrasaun loron FALINTIL ba tinan ne’e mak ho Espíritu FALINTIL nia mak “hau prontu no desididu atu servi interese Povu no Nasaun nian.” Tema ne’e partikularmente bolu ema ida-idak atu reafirma pozisaun ho reflexu ba istoria lalaok FALINTIL nian durante luta ba libertasaun Patria.

“Valor sira ne’ebé, Asuwain FALINTIL husik mai ita mak servi onestu atu kore povu ida ne’e husi mukit nia laran. FALINTIL, tuir nia naran rasik hatete, harii hodi liberta ita-nia rai husi okupasaun estranjeira, ho objetivu politíku atu manan funu hasoru invazor. Klaru, la fasil atu atinji mehi ida ne’e maibe, liu husi servisu hamutuk ho ita-nia povu, sai duni realidade. Tanba ne’e mak ita dehan beibeik katak FALINTIL mak ikan, Povu hanesan be’e. ” hatete Lú Olo.

Xefe Estadu dehanohin, espiritu FALINTIL sei fo inspirasaun, kbiit no determinasaun atu ema hotu lao ba oin hamutuk nafatin, to’o hetan dezenvolvimentu sosial no moris-diak ba povu tomak, hodi hametin fiar no domin ba rai rasik, ba sosiedade no nasaun tomak, hanesan saída mak Asuwain FALINTIL sira halo ona durante tinan rua nulu resin haat, hodi kore povu husi invazor sira-nia ukun.

“Demokrasia no liberdade hanesan konkista bo’ot ida husi FALINTIL, em partikular, no husi povu, no jeral. Iha tinan sanulu resin ualu, ita harii no konsolida nasaun Timor-Leste tuir prinsípiu Estadu Direitu Demokratiku, tuir Konstituisaun RDTL, no ita hatuur ona Orgaun Estadu ida-idak ho ninia kompetensia rasik, no labele interfere ba malu. Prinsípiu ida ne’e mak hau halo no kumpre durante ne’e,” dehan Lú Olo.

Aman Nasaun ne’e dehan maske iha situasaun polítika ne’ebé hamosu duvidas husi polítiku-nain balun ba orgaun estadu tomak, maibe veteranu, kombatente, joven no povu tomak kontinua tau konfiansa ba orgaun estadu nian. Ho orgulhu PR sauda maturidade povu Asuwain Timor-Leste, no veteranus FALINTIL iha loron ohin.

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here