Lú Olo & Alkatiri Kontribui Karau Ba Masjid An-nur

DILI, STLNEWS.co – Prezidente Republika (PR) Fransisco Guterres Lú Olo no eis Primeiru Ministru Mari Alkatiri kontribui karau rua ba iha Masjid An-nur, Kampung Alor, Dili.

Tuir Vise Prezidente Komunidade Musulmanu iha Timor Leste, Abdullah Antonio Inacio Soares katak, kada tinan tuir kultura neebe mak komunidade musulmanu iha neebe namkari iha nasaun hotu-hotu sempre selebra loron Idul Adha.

Tanba nee antes tama ba iha selebrasaun loron Idul Adha ba 1442 H nee responsavel musulmanu iha TL sempre kontaktu ba komunidade sira neebe iha kapasidade atu kontribui karau (hewan kurban) nunee iha loron 20 Jullu wainhira halo adorasaun hotu sei fahe naan karau (hewan kurban) nee ba komunidade sira.

“Karau (hewan kurban) sira neebe mak dadaun nee iha ona Masjid An-nur nee kontribui husi ita nia Prezidente Republika (PR) Fransisco Guterres Lú Olo no eis Primeiru Ministru Mari Alkatiri, no agora ami mos sei hein hela kontribuisaun husi Primeiru Ministru (PM) Taur Matan Ruak no Prezedente Parlamanetu Nasional (PPN) Aniceto Guterres,” dehan Vise Prezidente Komunidade Musulmanu iha Timor Leste, Abdullah Antonio Inacio Soares iha Masjid An-nur Kampung Alor, Segunda (19/07/2021).

Abdullah dehan, tuir kultura neebe iha wainhira komemora loron Idul Adha nee, karau sira neebe mak kontribui husi komunidade musulmanu nomos nai ulun sira iha TL, wainhira han hamutuk iha komemorasaun loron Idul Adha. sei fahe mos ba komunidade sira husi relijiaun seluk, liu liu sira neebe mak hela besik nee Masjid An-nur nee.

Nia hatutan, iha selebrasaun Idul Adha ba dala 1442 H nee hetan ona kontaku husi parte Igreija Katolika liu husi Parde Angelo Salsinha, no madre fo ona parabens ba komunidade musulmanu iha TL neebe komemora loron idul adha ba 1442 H.

Enkuantu kona ba komemorasaun loron Idul Adha ba dala 1442 H nee nia parte haruka ona karta ba Gabineti Prezidensial Republika nomos Gabineti Primeiru Ministru nia neebe husu atu partisipa iha komemorasaun neebe tuir ajenda sei realiza iha loron Tersa (20/07/2021) iha Masjid An-nur Kampun Alor.

Aleinde nee komunidade musulmanu neebe dadaun nee sirkula iha teritoriu hamutuk rihun 8 resin.*

Reportajen: Alberto Menezes
Editora: Domingas Gomes

LEAVE A REPLY

Please enter your comment!
Please enter your name here