Lú Olo: Estadu Tenke Defende Sidadaun Nia Direitu

Prezidente Republika Francisco Guterres Lú Olo dehan estadu tenke proteze no defende sidadaun sira nia direitu. Imajen ne'e STL foti iha seremonia komemorasaun aniversariu FALINTIL Forsa Defeza de Timor Leste (F-FDTL), ba dala 45 iha Kuartel Jeral Fatuhada Dili, bainhira labarik sira hanesan futuru nasaun nian partisipa iha seremonia komemorasaun Aniversariu (F-FDTL), Kinta (20/8/2020) (Photo: STL News/Donaciano Magalhães)

DILI, STLNEWS.co – Prezidente Republika (PR) Francisco Guterres Lu Olo dehan, estadu tenke proteze no defende sidadaun sira nia direitu.

Prezidente Republika Francisco Guterres Lú Olo hato’o kestaun nee, liu husi diskursu bainhira partisipa komemorasaun loron 20 de Agostu iha Kuartel Jeral Fatuhada, Kinta (20/08/2020.

“Estadu tenke ezerse ninia poder nuudar entidade publika, atu proteje no defende sidadaun sira-nia direitus. Sidadaun sira tenke iha konxiensia katak hotu-hotu, nuudar sidadaun, iha direitus maibe iha mos responsabilidades no deveres. Liberdade lao hamutuk ho responsabilidade, nune’e sidadaun ida ne’ebé livre iha responsabilidade ba ema seluk, ba povu tomak no ba estadu. Ho deit dalan ida ne’e mak ita bele afirma katak ho espíritu FALINTIL nian, hau prontu no desididu atu servi povu no nasaun nia interese.” dehan PR Lu Olo.

Liu husi diskursu, PR mos dehan nia halao funsaun hotu nuudar komandante Supremu forsa armadas no Prezidente Republika ba povu hakru’uk deit ba konstituisaun.

“Iha fatin ida ne’e, hau kontinua repete tan katak hau sei halao hau nia funsaun hotu nuudar Komandante Supremu Forsas Armadas, no Prezidente Republika ba povu tomak no hakru’uk deit ba Konstituisaun RDTL. Hanesan Komandante Supremu Forsas Armadas nian, hakarak afirma mos katak, artigu 87 alínea d) husi Konstituisaun RDTL fo kompetensia ba Prezidente Republika servisu ho Governu no kondús prosesu negosiasaun, kona-ba akordu internasional sira iha area Defeza no Seguransa. Liu husi akordu sira ne’e, ita tau atensaun ba planu atividade ne’ebé besik ba diplomasia defeza ho objetivu atu apoia forsa defeza no seguransa hodi bele kontribui ho diak ba polítika esterna. “ hatete Lú Olo.

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here