Lú Olo: Hamutuk Hapara Pandemia No Tau Aas Interese Publiku

Prezidente Republika (PR), Francisco Guterres Lú Olo. (Foto: Media PR)

DILI, STLNEWS.co – Prezidente Repubika Francisco Guterres Lú Olo husu ema hotu atu hamutuk hodi bele hapara pandemia, no husu atu tau aas interese publiku.

Prezidente Republika Francisco Guterres Lú Olo hatoo kestaun nee liu husi mensajen hosi iha okaziaun Serimonia Aniversariu Polísia Nasional Timor-Leste ba dala 21 iha Palasiu Prezidensial Nicolau Lobato, Sabadu (27/03/2021).

“Tempu too ona atu ita hothotu, no ita ida-idak, fo ita nia kontribuisaun atu hamutuk hakaat liu susar ida nee. Ita tenke hamutuk hodi hapara pandemia ida nee no tau aas interese publiku no proteje nasaun nia murak.

Maluk sira neebe iha responsabilidade aas iha ita nia sosiedade labele haluha no labele halo ema haluha risku neebe mak asosia ho Covid-19. Sira labele hasees an no labele halo ema hasees an hosi medida sira neebe Governu foti atu prevene no hamenus virus Covid-19 hadaet husi ema ba ema.“ hatete PR Lú Olo.

PR hatutan Iha situasaun krize neebe grave, hanesan situasaun pandemia neebe ema hasoru dadaun nee, tenke halo jestaun ida neebe efikas no efisiente.

“Nunee, ita presiza hatene saida mak ita atu halo, halo planeamentu, organizasaun, asaun no avaliasaun beibeik, no liuliu ita tenke foti desizaun oioin ho lalais. Ba ida nee, ita presiza rekursus hotu hotu, umanus, ekipamentu no orsamentu iha tempu badak nia laran atu nunee organizasaun no instituisaun sira bele atua kedas.” hatete PR.

Xefe estadu hatutan Sentru Integradu Jestaun Krize, nuudar estrutura ida neebe harii ho mekanismu ida neebe iha komandu, kontrolu no koordenasaun entre instituisaun sira, hatudu dadaun katak bele hatan diak ba krize ida nee tanba lao tuir kultura koopera malu no fahe malu sira nia rekursus no sistemas informasaun no komunikasaun.

Luta hasoru krime no aplika lei mak objetivu organizasional rua hosi polisia sira iha mundu tomak. Maibe, dezafiu sira neebe mosu ohin loron ho pandemia ida nee obriga polisia sira muda sira nia atuasaun. Tanba nee polisia sira iha mundu mos tenke foka liutan ba sira nia knaar nuudar instituisaun ida neebe dedika an liuliu ba apoiu umanitariu maibe lao nafatin nuudar instrumentu hasoru krime.

“Enkuantu Governu aplika medidas ona atu hamenus Covid-19 hadaet ba beibeik, mosu fali krime ho forma foun iha ita nia sosiedade. Krime la kumpre lei no violensia oioin, neebe iha relasaun ho jeneru no akontese mos iha uma laran. Nee duni, forsas no servisus seguransa, liu liu Polisia Nasional Timor Leste, tenke adapta ninia knaar ba situasaun foun ida nee.” Dehan nia.

Durante pandemia no izolamentu sosial, liafuan prinsipal mak solidariedade no konfiansa. Solidariedade katak fo liman ba malu, tulun malu atu hotu hotu bele hakaat risku sira neebe asosia ho pandemia, ho situasaun ida nee sidadaun sira tenke iha konfiansa ba instituisaun no haktuir medidas foti hosi governu.

“Iha momentu krize nian, normal katak sosiedade sivíl reklama atu iha orden liutan atu hatuur fila fali konfiansa ba sidadaun sira no garante seguransa ba ita nia ema no ita nia komunidade. Maibe tebes mos katak, iha tempu susar ida nee mak sidadaun ida-idak presiza hasae aas liu tan ninia dever sira, duke reklama direitu sira no hatudu an nuudar sidadaun ho valor etiku, ho sivizmu neebe hatene respeita no kumpre medidas saude publiku hatun hosi governu.” dehan nia.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here