DILI, STLNEWS.co – Kandidatu Prezidente Republika atual Prezidente Republika Francisco Guterres Lú Olo hatete, nudar sidadaun iha nia vida politika seidauk hotu, sei hatene ba dook.
Kandidatu Lú Olo hatoo kestaun nee liu husi nia deklarasaun Publiku aseita rezultadu eleisaun prezidensial neebe mak halao wainhira resposta ba perguntas husi jornalista sira iha sede Luz Clarita, Formoza, Sesta nee(22/04/2022).
Kandidatu Lú Olo dehan, nia senti orgulhu ba nia aan hanesan Prezidente Republika, neebe nia kumpri nia mandatu tinan 5 ho dignidade, maski situasaun difisil tebes ba nia, maibe konsege ultrapasa situasaun sira nee hotu hodi halo nasaun hakmatek no povu hakmatek.
Nunee mos Sekretariu Jeral Partidu FRETILIN, Mari Alkatiri hatoo nia admirasaun boot ba kandidatu Lú Olo, tanba ho korajen no dignidade hodi aseita rezultadu ida nee.
“Hanesan Sekretariu Jeral Partidu FRETILIN, hau so bele dehan kamarada Lú Olo FRETILIN hein hela ita boot,” dehan Sekretariu Jeral Partidu FRETILIN Mari Alkatiri.
Nunee mos Prezidente Frente Mudansa, Eugenio de Jesus hatete, Partidu Frente Mudansa husi nasional too baze apoiu kandidatu Lú Olo sem rezerva, maibe hotu-hotu aseita tuir saida mak kandidatu Lú Olo esklarese ona, tanba demokrasia nia ilas mak nee duni.
(eme)