Lú Olo: Ukun Aan Mai Husi Sakrifisiu

Prezidente Republika Francisco Guterres Lú Olo hatete Timor Leste nia ukun rasik aan mai husi sakrifisiu no hatene fo valor nuudar povu no nasaun. (Foto: STL/Donaciano Magalhães)

LIQUICA, STLNEWS.co – Prezidente Republika Francisco Guterres Lú Olo hatete Timor Leste nia ukun rasik aan mai husi sakrifisiu no hatene fo valor nuudar povu no nasaun.

Prezidente Republika Francisco Guterres Lú Olo hatoo kestaun nee liu husi nia diskursu bainhira komemora 28 Novembru ba dala 45 iha munisipiu Liquica, Sabado (28/11/2020).

“Haree ba ita-nia istoria luta libertasaun nasional, ita bele hatete katak ita-nia ukun-an nee mai husi sakrifísiu husi ita-nia ema sira neebe hatene fo valor ba sentidu moris nuudar povu no nasaun, moris iha rai-laran, iha vila, iha foho leten ka rai-liur.” hatete PR Lú Olo.

Lú Olo hatutan ho haksolok boot tebes mak Prezidente Republika mai Liquica, hamutuk ho Governu, Parlamentu Nasional, Tribunal Rekursu, instituisaun publika sira, komunidade Liquica, asuain sira no família martir sira-nian, fo onra ba eroi sira no dignifika loron ohin, nuudar loron neebe hahu moris ho sentimentu orgulho, iha rai kiik ida nee, ho sentidu povu no nasaun.

“Bainhira ita restaura indepedensia iha 20 maiu 2002, ita-nia Konstituisaun hili nafatin 28 novembru 1975, nuudar loron indepedensia atu ita afirma-an nafatin ba mundu katak ita-nia luta ba indepedensia nee mai husi prosesu ida neebe naruk no susar tebes. Katak ita Timoroan mak hakarak tula mehi boot nee iha ita-nia kabaas leten, ita mak autor ba prosesu nee, ita mak halo ita-nia istoria ukun rasik-an. Tanba ita-nia luta rasik no tanba ita konsege komunidade internasional rekonese ita-nia luta nee, mak mosu referendu organiza husi ONU, iha 30 Agostu 1999, nuudar aktu ida hodi hakotu funu iha Timor-Leste.” hatete PR.

Referendu nee laos mosu derepente deit husi ONU, maibe nuudar konsekuensia ida husi Timoroan nia luta no determinasaun, iha rai-laran no iha rai-liur.

“Ita kaer fila fali prosesu ukun-an husi 20 maiu 2002 ho konstituisaun ida modernu, ho orgaun soberania haat neebe independente maibe iha relasaun ba malu Prezidente Republika, Parlamentu Nasional, Governu no Tribunal sira, hodi halo ezersísiu Poder Demokratiku neebe hatur iha povu nia vontade rasik” afirma nia.

Xefe Estadu hatutan konstituisaun define momoos knaar ida-idak nian no oinsa sira relasiona malu, ema balun la interpreta ho diak saída mak konstituisaun nee hateten, haruka no haktuir ba ema hotu tenke kumpre.

Tanba balun la interpreta tuir nia sentidu loloos mak mosu diverjensia oioin iha sosiedade laran, inklui entre orgaun soberania sira. Tanba mos problema interpretasaun mak mosu ona krize polítika boot tolu, Timor-Leste livre no independente.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here